O titular do Goberno galego, Alfonso Rueda, puxo en valor hoxe a aprobación no Consello da Xunta dun paquete de medidas por preto de 50 millóns de euros destinado a axudar as persoas en risco de exclusión, as familias, os maiores e as persoas con discapacidade. Segundo precisou, este investimento canalizarase a través de dúas ordes de axudas, de 19,7 e 18,5 millóns de euros. Esta última será ampliada nos vindeiros meses con outros 10 millóns de euros. Con estas partidas, considerou que se achegan ás entidades sociais “os recursos necesarios para mellorar a súa atención”.

Orde a cargo do IRPF

En canto á segunda orde de axudas, o presidente galego informou de que está financiada con cargo ao Imposto sobre a renda de persoas físicas (IRPF) e conta cun orzamento de 18,5 millóns de euros, que será ampliado nos vindeiros meses ata os 28 millóns de euros.

Rueda lembrou que desde hai tempo o IRPF permítelles aos contribuíntes destinar un 0,7 por cento da súa cota íntegra a fins sociais e, desde 2017, a maior parte desta contía é xestionada polas comunidades autónomas.

Estes fondos, que financiarán tamén diferentes iniciativas, así como gastos de investimento referidos a obras, equipamento ou rehabilitación de centros, irán destinados tamén ás entidades sociais no seu amplo abano, tanto para aquelas que traballan na asistencia a persoas en situación de exclusión social como aquelas que o fan con maiores, persoas con discapacidade, menores ou coa mocidade.