A Xunta aposta polo sector aceiteiro en Galicia e salienta a calidade das variedades autóctonas
José Balseiros participou esta mañá en Sanxenxo nunha cata e degustación de aceites de oliva virxe extra (AOVE), na que destacou a calidade dos aceites galegos e apostou polo traballo das empresas participantes para que continúen elaborando produtos de calidade
O director xeral de Gandaría, Agricultura e Industrias Agroalimentarias, José Balseiros, participou esta mañá en Sanxenxo na cata de aceites de oliva virxe extra (AOVE) que organizou o Obradoiro de emprego da Mancomunidade do Salnés. Nesta xornada de cata e degustación participaron empresas galegas do sector cos seus diferentes produtos.
Así, José Balseiros salientou a calidade dos aceites presentados nesta degustación por empresas da zona; así coma do resto de produtos derivados da oliva galega. O director xeral apostou por manter as variedades autóctonas de Galicia que fan do noso produto un aceite propio e diferente do resto.
Este encontro enmárcase dentro das xornadas formativas que organiza a Mancomunidade do Salnés “Hostalería do Salnés” para alumnos e profesores; así como para todas aquelas persoas que queiran asistir durante a xornada de portas abertas.