O presidente da Xunta reuniuse co embaixador do país nipón en España, Takahiro Nakamae
Rueda salienta o interese de Galicia en reforzar as relacións co Xapón, en especial nos sectores da automoción, do turismo e das enerxías renovables
No último quinquenio as exportacións galegas ao país nipón medraron un 82 %, concentrándose nos sectores do automóbil e de produtos pesqueiros
Este mesmo ano porase en marcha a Antena Igape en Toquio para impulsar a diversificación das exportacións galegas e aproveitar as oportunidades de captación de investimentos para Galicia, xa que as enerxías renovables son un dos sectores nos que se agarda un maior crecemento no Xapón
A Comunidade galega estará presente na feira turística xaponesa máis importante, a Tourism Expo Japan-Jata-2023, que se celebrará en Osaka do 26 ao 29 de outubro
O presidente da Xunta, Alfonso Rueda, salientou hoxe o interese do Goberno galego en reforzar as estreitas relacións comerciais e culturais que mantén na actualidade Galicia co Xapón, en especial no referente aos sectores da automoción, do turismo e tamén no das enerxías renovables.
Novas oportunidades no sector das enerxías renovables
As boas relacións comerciais tamén se poñen de manifesto no feito de que o Goberno galego porá en marcha este mesmo ano a Antena Igape en Toquio. Trátase dunha ferramenta baseada na oferta dunha serie de servizos personalizados que ten como propósito diversificar as exportacións do tecido empresarial galego, así como aproveitar as oportunidade de captación de investimentos para Galicia.
Precisamente, entre os sectores nos que se prevé un maior crecemento no Xapón para os vindeiros anos, ademais no das telecomunicacións ou no da biotecnoloxía, atópase o das enerxías renovables, nos que Galicia ten un enorme potencial para converterse en referente.
25 anos de Irmandade entre Camiño de Santiago e o Camiño Kumano-Kodo
A colaboración entre Galicia e o país nipón tamén está cimentada na irmandade existentes desde 1998 entre o Camiño de Santiago e o Camiño Kumano-Kodo, que ten propiciado, no seus 25 anos de posta en marcha, a chamada ‘peregrinación dual’ en ambas rutas e tamén ten acadado darlle pulo ao incremento de cidadáns xaponeses que deciden facer algunha ruta xacobea e descubrir, deste xeito, Galicia.
Precisamente, o presidente da Xunta apuntoulle ao embaixador do Xapón en España que a Comunidade galega estará presente na Tourism Expo Japan-Jata-2023, a feira turística máis importante neste país e que se celebrará en Osaka do 26 ao 29 de outubro.
Imaxes relacionadas
