O complexo residencial Lug 2, dependente da Consellería de Política Social e Xuventude, acolle desde hoxe ata o xoves un encontro internacional con máis de 60 mozos e mozas de nove países que intercambiarán ideas e experiencias co foco posto no futuro das zonas rurais.

O delegado territorial da Xunta en Lugo, Javier Arias, participou na inauguración desta actividade, que reúne a xuventude de Galicia, Portugal, Malta, Romanía, Italia, Alemaña, Rusia, Túnez e Marrocos.

Os asistentes porán a proba a súa creatividade para xerar experiencias innovadoras que ofrezan novas posibilidades de emprendemento no rural a través da tecnoloxía; e analizar a súa utilidade en sectores como o agroalimentario, o forestal ou o turismo.

Expertos nos diferentes campos incluídos no programa guiarán os talleres e actividades. Na última xornada os participantes presentarán os seus proxectos a un xurado, que elixirá os que queden finalistas.

A mocidade asistente tamén terá a oportunidade de coñecer a cidade de Lugo, visitar as praias da A Mariña e achegarse ao Camiño Francés ao seu paso polos concellos do Cebreiro e Samos.

Este evento forma parte do proxecto europeo RuYou (Rural Youth of Europe), cuxo obxectivo é o de potenciar a colaboración internacional e o emprendemento entre a mocidade para construír o novo futuro de Europa. Así, búscase fomentar o intercambio de ideas, estimular a creatividade das xente nova e fomentar a súa implicación na sociedade do futuro.