A Xunta de Galicia pon en marcha o plan de inspección de seguridade industrial co que se realizarán máis de 1400 controis
O Diario Oficial de Galicia publica hoxe as actuacións coas que se comprobará a adecuación dos establecementos, instalacións, actividades e produtos respecto dos regulamentos de seguridade industrial e normativas que lle sexan aplicables
O Diario Oficial de Galicia publica hoxe o Plan de Inspección de Seguridade Industrial para 2023, no que se establecen máis de 1400 controis. O obxectivo é comprobar a adecuación dos establecementos, instalacións, actividades e produtos respecto dos regulamentos de seguridade industrial e normativas que lles sexan aplicables.
O plan, posto en marcha desde a Vicepresidencia primeira e Consellería de Economía, Industria e Innovación, está composto por catro programas de inspección: instalacións sometidas a regulamentos de seguridade (entre as que se inclúen instalacións eléctricas, ascensores, estacións de servizo ou instalacións térmicas en edificios, entre outros); empresas instaladoras ou de mantemento no ámbito da seguridade industrial; accidentes graves; e empresas que manipulan gases fluorados, unha das novidades que presenta o plan para este ano.
As xefaturas territoriais da Vicepresidencia primeira e Consellería de Economía, Industria e Innovación farán a selección dos establecementos, instalacións e actividades que sexan obxecto de inspección e dito plan estará vixente ata o 31 de marzo do próximo ano.
PROGRAMAS | SECTORES | Nº INSPECCIÓNS |
Instalacións sometidas a regulamentos de seguridade industrial | Instalacións eléctricas de baixa tensión | 250 |
Instalacións de xeración asociadas ao autoconsumo | P>=125kW:200 | |
Alta tensión e centros de transformación particulares | 200 | |
Ascensores | 150 | |
Instalacións de distribución polo miúdo de produtos petrolíferos líquidos: subministración a vehículos | 100 | |
Instalacións de distribución de produtos petrolíferos para a subministración de combustible a vehículos propios | 100 | |
Instalacións térmicas en edificios | 50 | |
Instalacións de almacenamento de produtos químicos | 50 | |
Instalacións de seguridade contra incendios en establecementos industriais | 50 | |
Empresas instaladoras ou mantedoras no ámbito da seguridade industrial | Declaracións responsables de empresas instaladoras ou mantedoras no ámbito da seguridade industrial | 200 |
Accidentes graves | Establecementos industriais afectados polo Real decreto 840/2015, do 21 de setembro, no seu nivel superior | Todas as de nivel superior |
Empresas que manipulan gases fluorados | Declaracións responsables de empresas que manipulan gases fluorados nos ámbitos das instalacións frigoríficas, instalacións térmicas en edificios, instalacións de protección contra incendios e en instalacións de alta tensión | 50 |
