O conselleiro de Sanidade destaca o nivel de especialización dos profesionais da Unidade Médico-Cirúrxica de Cardiopatías Conxénitas do CHUAC
García Comesaña participou esta mañá no acto do 25 aniversario dunha unidade que é referente a nivel autonómico e nacional
Desde a súa posta en marcha, a Unidade de Cardiopatías Conxénitas do CHUAC realizou máis de 2.500 intervencións e, entre os anos 2010 e 2022 rexistrou un total de 35.290 consultas
O titular da carteira sanitaria da Xunta agradeceu a colaboración da Sociedade de Pediatría de Galicia, e a implicación de colectivo do ámbito social como a Asociación Late Corazón ou a Fundación María José Jove
Así mesmo, puxo en valor a recente incorporación de equipamentos de altas prestacións cos que se optimizou a calidade asistencial deste servizo
O conselleiro de Sanidade, Julio García Comesaña, participou esta mañá nos actos do 25º Aniversario da Unidade Médico-Cirúrxica de Cardiopatías Conxénitas do Complexo hospitalario Universitario da Coruña. Un evento no que destacou o alto nivel de especialización dos profesionais que desempeñan o seu labor neste servizo do CHUAC.
Desde o ano 1998, o Hospital Universitario da Coruña conta cun programa estable de tratamento das cardiopatías conxénitas, o que fai que sexa centro de referencia tanto a nivel autonómico, como nacional.
As cardiopatías conxénitas son un grupo de enfermidades que se caracterizan pola presenza de alteracións na estrutura do corazón ao nacer. Así, desde a posta en marcha da Unidade de Cardiopatías Conxénitas do CHUAC, esta realizou xa máis de 2.500 intervencións e, entre os ano 2010 e 2022, rexistrou un total de 35.290 consultas infantís e pediátricas. Anualmente, realiza máis dun cento de cirurxías cardíacas, e tamén leva a cabo máis de 100 de cateterismos no ámbito cardíaco.
Durante o acto, García Comesaña puxo de relevo a recente incorporación de equipamento de altas prestacións neste servizo, cos que se optimizou a súa calidade asistencial. Neste senso, apuntou que dous ecocardiógrafos de última xeración tiveron como destino o CHUAC e, máis en concreto, un deles foi emprazado na súa área de Cardioloxía pediátrica.
O titular da carteira sanitaria da Xunta tivo palabras de recoñecemento para a Sociedade de Pediatría de Galicia pola súa colaboración, e destacou a implicación de colectivos do ámbito social, como é caso da Asociación Late Corazón; ou da Fundación María José Jove, que a través do programa “Hogar de Corazones”, facilita o aloxamento dos familiares dos pacientes infantís con cardiopatías.
Imaxes relacionadas
