Santiago de Compostela, 8 de xuño de 2023 A Xunta de Galicia acaba de ampliar ata preto de 21 millóns de euros —4,67 millóns de euros reservados para vítimas de violencia de xénero e 16,3 millóns de euros para o resto de beneficiarios— o orzamento total dispoñible para pagar o Bono de alugueiro social, unha prestación que garante a cobertura da renda da vivenda habitual a colectivos e familias que, por diversos motivos, se ven afectadas por unha situación de vulnerabilidade.

Coa resolución do Instituto Galego da Vivenda e Solo (IGVS) que se recolle hoxe no Diario Oficial de Galicia, a actual convocatoria do bono —publicada en xullo do ano pasado e vixente ata o ano 2026— suma un total de 2,3 millóns de euros aos fondos inicialmente previstos, ampliación que se repartirá entre os exercicios 2023, 2024 e 2025 e permitirá chegar a un maior número de beneficiarios.

O obxectivo deste programa é facilitar o acceso ou o mantemento dun fogar a colectivos desfavorecidos, especificamente a afectados por unha demanda de desafiuzamento ou un procedemento de execución hipotecaria, vítimas de violencia de xénero e mulleres que sofren trata con fins de explotación sexual, fillos menores de 30 anos de vítimas mortais por violencia de xénero, persoas privadas da súa vivenda por causas sobrevidas e imprevistas ou que se atopen en situación de emerxencia social, e mozos tutelados pola Xunta unha vez acadan a maioría de idade, entre outros.

Co fin de paliar este tipo de situacións de vulnerabilidade, os beneficiarios teñen dereito a unha prestación que, desde o ano 2020, equivale ao 100% da renda que figure no seu contrato de alugueiro, sempre e cando esta non supere a contía límite establecida polo Instituto Galego da Vivenda e Solo (IGVS) para cada área xeográfica.

Deste xeito, nas 7 grandes cidades o importe que asume a Xunta é de, como máximo, 550 euros ao mes; nos concellos de tamaño medio e localizados en contornas urbanas, está fixado en 500 euros; e no resto de municipios, o límite acada os 425 euros.

En todo caso, estas contías increméntanse nun 20% cando a unidade de convivencia do beneficiario necesite dispoñer dunha vivenda adaptada ou estea integrada por 5 ou máis membros polo que nestes supostos o importe do bono poderá chegar ata os 660, 600 ou 510 euros, respectivamente e segundo a zona.

1,5 veces o Iprem

Para acceder a estes incentivos, os solicitantes deben acreditar uns ingresos ponderados da unidade de convivencia inferiores a 1,5 veces o Iprem —entre 12.600 euros anuais en 14 pagas para unidades familiares de 1 membro e 21.000 euros anuais para familias de 5 ou máis membros—. Esta contía vese incrementada en función do número de convivintes e doutras circunstancias particulares que ponderan para o límite de ingresos.

Ademais, os perceptores desta prestación tamén poden recibir unha axuda complementaria de ata 600 euros destinada a pagar os gastos asociados á constitución dun novo contrato de alugamento —fianza, alta de subministros, etc.— ou ben a atender as cantidades pendentes de pago que motivaron o procedemento de desafiuzamento.

O Bono de alugueiro social concédese por un período de 12 meses consecutivos, aínda que poden solicitarse 4 prórrogas. Deste xeito, os beneficiarios teñen dereito a percibir esta axuda que lles garante a cobertura total do seu alugueiro por un máximo de 5 anos.