O secretario xeral da Emigración, Antonio Rodríguez Miranda, mantivo un encontro co cónsul xeral de España en Múnic, Ángel Boixareu, na que se interesou pola situación da colectividade española e galega e lle trasladou os programas de apoio que destina a Xunta de Galicia para as entidades galegas en Alemaña así como os que se están a poñer en marcha para impulsar o retorno dos galegos do exterior.

Antonio Rodríguez Miranda ofreceu a colaboración da Xunta de Galicia para traballar “man a man” en prol da colectividade española, e en particular, dos galegos. Deste xeito, aproveitou para solicitarlle o apoio do consulado para facer chegar a colectividade galega a nova Estratexia Retorna 2026 (ERG2026) recordándolle que ten como principal novidade ampliar o apoio e asesoramento laboral ás familias retornadas galegas.