Santiago de Compostela, 25 de maio de 2023 A Consellería de Infraestruturas e Mobilidade, a través de Augas de Galicia, adxudicou as obras para a instalación de enerxía solar fotovoltaica na estación depuradora de augas residuais de Tomiño.

Esta intervención, adxudicada á empresa Inelsa Electricidad, S.L.U. por preto de 50.000 euros, comprende a redacción do proxecto técnico, dirección de obra, tramitación administrativa e execución dunha instalación fotovoltaica de 45 kWp para autoconsumo, nos terreos asociados á depuradora municipal, que xestiona a entidade hidráulica da Xunta.

Mediante este contrato a entidade Hidráulica da Xunta busca garantir o aforro económico na facturación eléctrica derivada da xestión da estación depuradora, ao tempo que acadar unha importante redución de emisións de CO² equivalente.

Estas intervencións contan con financiamento europeo a través do Fondo Europeo de Desenvolvemento Rexional, no marco do programa operativo de cooperación transfronteiriza España-Portugal 2014-2020 e do proxecto Aqualitrans II 1 E.

As obras nas instalacións de Tomiño súmanse ás que tamén se realizarán nas depuradoras dos concellos de Vilaboa e Nigrán, no concello lucense de Alfoz e no municipio coruñés de Ortigueira, xa adxudicadas, e que forman parte das actuacións que impulsa a Xunta para avanzar cara á neutralidade enerxética nas estacións depuradoras de augas residuais xestionadas por Augas de Galicia.