A directora de Turismo de Galicia, Nava Castro, participou esta mañá no Consello de Turismo que aprobou hoxe, en sesión extraordinaria, a declaración do concello de Muíños como municipio turístico e a  declaración como festa de interese turístico de Galicia, a festa do San Antonio Ventureiro de Rigueira, no concello de Xove.

O Consello de Turismo segundo a documentación presentada, emitiu informe favorable a declaración do Concello de Muíños como municipio turístico, ao abeiro do disposto no artigo 15 do Decreto 32/2015, do 19 de febreiro, polo que se regula a declaración de municipio turístico.

Así mesmo, foi aprobada a declaración da romaría de San Antonio Ventureiro da Rigueira, do concello de Xove, como festa de interese turístico de Galicia. Celébrase cada 13 de xuño coincidindo coa festividade que conmemora o pasamento de San Antonio de Padua. 

Tal e como dispón o decreto o 4/2015, do 8 de xaneiro, polo que se regula a declaración de festas de interese turístico de Galicia, a declaración efectuarase en función do cumprimento dos requisitos de antigüidade, singularidade, arraigamento, valor cultural e continuidade no tempo.