Vilanova de Arousa (Pontevedra), 22 de maio 2023 A Xunta fixa como obxectivo completar este ano a reconstrución do treito sobre o río da ponte de Ponte Arnelas cunha intervención que mudará a súa fisionomía.

Así o trasladou esta mañá a conselleira de Infraestruturas e Mobilidade, Ethel Vázquez, na reunión de traballo mantida cos alcaldes de Vilanova de Arousa, Gonzalo Durán, e de Ribadumia, David Castro, na que abordou o programa para a reconstrución da ponte que comunica ambos os dous concellos a través da estrada autonómica PO-300.

Vázquez Mourelle informoulles das intervencións xa feitas na ponte de Ponte Arnelas desde o seu peche o 18 de abril, tras detectarse danos en varias péndoas que provocaron que a calzada cedese parcialmente, lembrando que ao dia seguinte,  na mañá do 19 de abril, visitou o lugar e se comprometeu cos alcaldes a traballar coa máxima axilidade.

A titular de Infraestruturas incidiu no cumprimento do compromiso da Xunta, adoptando desde o primeiro momento as medidas necesarias para que non houbese circulación rodada nin peonil por motivos de seguridade, ao tempo que se traballaba de forma ininterrompida con medidas encamiñadas a evitar que se agrave a situación e procurar que a restitución da normalidade se produza o antes posible.

A conselleira explicou o plan de traballo decidido para reconstrución parcial que se ten que acometer na ponte para que poida retomarse a circulación viaria e peonil en condicións de plena seguridade. Avanzou que se acometerá unha actuación importante sobre o treito do río que suporá mudar a tipoloxía e a fisionomía da ponte, que perderá o seu arco e os seus tirantes, pero que gañará notablemente en estética e integración.

Concretamente, intervirase só nun dos 5 vans da ponte, é dicir, só na parte que vai sobre o río. Para iso, segundo indicou a conselleira, o primeiro que se ten que facer será a desmontaxe desa parte do viaduto para, a continuación, proceder á súa reconstrución.

Na intervención de reconstrución reforzarase a cimentación da ponte e, a continuación, montarase a nova estrutura metálica sobre a que, posteriormente, se colocarán as prelousas, que serán prefabricadas para axilizar os prazos. A partir de aí será necesaria unha fase de traballo sobre o terreo en ferrallado, impermeabilización, pavimentación, pintado, instalación de peitorís, etc.

Ethel Vázquez sinalou o obxectivo de ter desmontada a ponte no verán e comezar deseguido a súa reconstrución, co fin de que poida estar rematada a finais deste ano ou, como moito, a principios do vindeiro, condicionado á subministración de materiais.

A reconstrución xa en marcha

A conselleira fixo fincapé no cumprimento do compromiso adquirido cos alcaldes de ambos os dous municipios de traballar coa maior dilixencia para garantir, dunha banda, a seguridade das persoas e, doutra banda, restituír a circulación no menor prazo posible.

A titular de Infraestruturas lembrou que o primeiro que se fixo foi inspeccionar en profundidade a estrutura, para aclarar as causas do sucedido e para coñecer o alcance dos danos, que se concentran no vano central da ponte. Así, xa nos primeiros días constatouse que a corrosión e oxidación, principalmente, na base das péndoas que sustentan o arco da ponte, provocou a súa rotura e o afundimento de parte da calzada.

Desde o primeiro momento tamén se fixo un seguimento da estabilidade da estrutura, que non se moveu. En todo caso, priorizouse evitar calquera risco de derrubamento, para o que se procedeu ao apuntalamento da ponte por ambas as marxes, uns traballos que xa están concluídos. A titular de Infraestruturas lembrou a complexidade destes traballos, posto que se está a actuar no leito dun río, que hai que respectar, polo que os traballos se coordinaron con Augas de Galicia, tendo en conta tamén o réxime de desaugamento do encoro de Caldas.

O seguinte paso previsto é retirar o peitoril para reducir o peso que soporta, que se vai comezar nos vindeiros días, facendo control constante sobre como vai respondendo a estrutura.

Paralelamente, e tendo en conta a información sobre o estado da estrutura que deron as inspeccións e que apuntan á necesidade de intervir unicamente no treito central da ponte onde se concentraron os danos, a Xunta traballou no deseño e análise das diferentes alternativas para a reconstrución que hoxe se abordou cos alcaldes.

Un labor que, tal e como subliñou Ethel Vázquez, se sustenta tamén nos traballos de xeotecnia que se están a realizar sobre o terreo desde o pasado xoves, o que na práctica supón que a reconstrución de Ponte Arnelas xa está en marcha.