O director do Instituto de Estudos do Territorio explicoulles as funcións e actividades que desenvolve este organismo
Unha delegación do alumnado de enxeñería civil da USC visita o IET para coñecer o seu traballo en materia de cartografía e protección da paisaxe
Enrique de Salvador subliña que esta visita supón un reforzo para a formación integral destes estudantes
Unha delegación de alumnado do Grao de Enxeñería Civil da Escola Politécnica Superior de Enxeñería da Universidade de Santiago visitaron recentemente o Instituto de Estudos do Territorio (IET), dependente da Consellería de Medio Ambiente, Territorio e Vivenda, para coñecer o seu traballo en materia de cartografía e protección da paisaxe.
O director do IET, Enrique de Salvador, subliñou que esta visita supón un reforzo para a formación integral destes estudantes xa que tiveron a oportunidade de coñecer as ferramentas coas que conta o organismo para desenvolver as súas funcións no tratamento da información cartográfica, a xestión de datos espaciais, visores, ordenación do territorio e no estudio e conservación da paisaxe.
Así mesmo, o alumnado puido comprobar a aplicación das técnicas e tecnoloxías que se empregan no eido dos sistemas de información xeográfica, que permiten unha mellor planificación de proxectos técnicos tanto no que atinxe á súa construción como ao mantemento e conservación de infraestruturas xa existentes.
De Salvador subliñou que a finalidade desta visita é avanzar na capacitación do alumnado en estudos de planificación territorial para que asuman a importancia de considerar os aspectos ambientais á hora de elaborar os seus proxectos para dotar os espazos urbanos de deseños sostibles, respectuosos coa contorna e acordes ás necesidades da cidadanía.