O comezo das obras de reurbanización da avenida Rodríguez de Viguri de Santiago fará necesario o corte dun carril a partir deste vindeiro xoves 18
Esta actuación, que suporá un investimento de máis de 1,6 M€, remodelará esta rúa da contorna do actual edificio administrativo da Xunta, dispoñendo unha zona de parada de autobús con marquesiñas, dous itinerarios para ciclistas e estacionamentos de bicicleta
Nesta primeira fase inicial das obras manterase o dobre sentido de circulación cun só carril habilitado para realizar as catas para detectar os servizos existentes baixo o pavimento
Adecuarase a rúa ao novo edificio administrativo, dando continuidade á urbanización realizada no tramo anterior de Rodríguez de Viguri e será tamén punto de partida da senda que unirá San Caetano coa intermodal e co Milladoiro
A parada terá capacidade suficiente para dar cabida a 5 autobuses de liña regular ao mesmo tempo, dando servizo tamén aos autobuses urbanos que conectan co aeroporto e coa estación intermodal
Esta actuación está vinculada á obras dos dous primeiros módulos do edificio administrativo Cidade San Caetano, actualmente en fase de adxudicación
O comezo da execución das obras de reurbanización da avenida de Rodríguez de Viguri, en Santiago de Compostela, e a súa integración como nó de intercambio modal do transporte público na futura cidade de San Caetano, fará necesario o corte dun carril a partir deste vindeiro xoves, día 18 de maio.
Para acometer estas actuacións, nesta primeira fase inicial das obras manterase o dobre sentido de circulación cun só carril habilitado, para poder realizar todas as catas necesarias para detectar os servizos existentes baixo o pavimento. Dado que o 18 de maio é festivo local en Santiago, iniciaranse as obras ese día, cando se prevé menos tráfico na contorna, o que facilitará a realización destes traballos.
En concreto, a obra que iniciará este vindeiro xoves adecuará a rúa ao novo edificio administrativo e darase continuidade á urbanización levada a cabo no treito anterior de Rodríguez de Viguri.
O detalle dos traballos que se inician
En concreto, as obras que se inician este vindeiro xoves para a reurbanización do treito da avenida Rodríguez de Viguri permitirán unha configuración na que o espazo para peóns e ciclistas gaña protagonismo con respecto á situación actual.
Esta intervención configurará este treito como un bulevar para dar continuidade ao treito xa remodelado da rúa, con arborado en ambas as marxes da calzada, e neste caso tamén na mediana intermedia, que será axardinada. A calzada, tanto no sentido ascendente como descendente, contará con dous carrís de circulación, como xa sucede no treito anterior da avenida. Nas beirarrúas o pavimento será de aglomerado pulido e de formigón nos carrís-bici.
