A Consellería de Promoción do Emprego e Igualdade participa hoxe e mañá na feira virtual de emprego promovida pola Universidade de Santiago para brindar ao alumnado ofertas laborais e actividades de apoio para mellorar a empregabilidade de persoas mozas.   

O departamento da Xunta abriu o seu propio stand en liña, no espazo habilitado polo ente académico para dar coñecer á comunidade universitaria os apoios autonómicos ao emprendemento, que convive cos abertos por outras 34 entidades nesta feira.

No mesmo, ofreceranse dúas conferencias programadas para o día de hoxe. Unha primeira, prevista ás 10,30 horas estará protagonizada por persoal técnico da Rede de polos de emprendemento e apoio ao emprego da Xunta de Galicia sobre as oportunidades que brindan estes espazos (15 previstos en Galicia este ano) para iniciar actividades empresariais vencelladas coa contorna e o territorio no que se asentan.

A segunda das charlas celebrarase tamén mañá en horario de tarde, a partires das 16,30 horas, e será impartida por profesionais da Rede Eusumo, unha rede de emprendemento en economía social a través da cal se organizan actividades formativas, cursos de formación e apoio e asesoramento a proxectos de economía social.

Coa súa participación, o Goberno autonómico quere reforzar o contacto coas persoas mozas para facelas partícipes dos apoios autonómicos existentes para impulsar as súas oportunidades laborais e acompañalas na busca de traballo ou no desenvolvemento dun proxecto de negocio propio. A mocidade é un dos colectivos prioritarios das políticas activas de emprego que a Xunta promove cada ano e o contacto co eido universitario amplifica a difusión dos apoios autonómicos dirixidos a ela.