Santiago de Compostela, 9 de maio de 2023 O Diario Oficial de Galicia (DOG) publica hoxe unha nova orde da Consellería do Medio Rural pola que se establecen as bases reguladoras -e se convocan para o ano 2023- das subvencións ás organizacións profesionais agrarias e asociacións do sector para a adquisición e mantemento dos bens informáticos e dos medios técnicos necesarios para o desenvolvemento das súas actividades.

A medida, que é a segunda vez que se convoca, está dotada cun orzamento de 130.000 euros e ten como finalidade favorecer a actualización informática das organizacións profesionais e asociacións agrarias. A contía das axudas será do 50% dos custos subvencionables, cun límite máximo de ata 30.000 euros para as organizacións profesionais e de ata 15.000 euros no caso das asociacións.

Así, entre os investimentos subvencionables figuran a adquisición de hardware e software informático, tales como o equipamento do posto de traballo fixo e móbil, equipamentos de impresión e dixitalización de documentos, equipamentos e instalación de redes e servidores, así como de captura de imaxes, vídeos e dispositivos de proxección. Tamén se financiará a compra de software e dispositivos de seguridade. En calquera caso, todos estes bens de equipo deberán destinarse, como mínimo, durante dous anos ao fin concreto para o que se concedeu a subvención. 

Os interesados teñen o prazo dun mes dende mañá, día seguinte ao da publicación desta orde, para presentar as súas correspondentes solicitudes de forma telemática.