O Consello da Xunta informou, na súa reunión desta mañá, do convenio de colaboración coa Asociación de Industrias do Metal e Tecnoloxías Asociadas de Galicia (Asime) para o impulso da cadea de valor industrial da eólica mariña na Comunidade.

Esta colaboración institucional, por importe de 62.000 euros, permitirá levar a cabo actuacións que respondan aos obxectivos compartidos entre as dúas entidades participantes, como a realización do mapa de capacidades da cadea de valor da eólica offshore en Galicia e o desenvolvemento de accións de promoción, difusión e divulgación sobre a cadea de valor industrial da eólica offshore de Galicia, identificación de oportunidades, promoción da colaboración entre empresas, administracións públicas e outros interesados, apoio ao crecemento do mercado a través da promoción de políticas e regulacións favorables e mellora da competitividade a través de estratexias de investigación e desenvolvementos tecnolóxicos.

Desde a defensa dunha eólica offshore compatible co medio natural e coas actividades vinculadas ao mar, o Goberno galego aposta por un desenvolvemento desta tecnoloxía a través dunha estratexia compartida que posicione Galicia como un referente internacional, tanto no eido de proxectos de demostración e impulso comercial desta alternativa eólica, como na consolidación dunha cadea de valor propia con proxección internacional.

A través deste convenio, impulsaranse encontros industriais, workshops, unha plataforma dixital que recolla as capacidades, experiencia e descrición das empresas que forman parte da cadea de valor industrial da eólica mariña, ademais de material promocional, como vídeos e catálogos. O sector do metal galego emprega a máis de 57.000 persoas e representa o 20 % do PIB de Galicia. Asime cumpriu no ano 2022 o seu 45 aniversario e agrupa máis de 600 empresas.

Este convenio permitirá sumar as capacidades que Asime ten nesta materia, pois a súa especialización contribuirá a avanzar na consolidación dunha industria asociada á eólica offshore e, en especial, á industria de compoñentes.

A eólica mariña é unha oportunidade con máis de 1200 millóns de euros de investimento previsto en fabricación de aeroxeradores e a creación de 8000 postos de traballo na Comunidade. Desde Galicia defendeuse, desde un primeiro momento, que o desenvolvemento da eólica mariña ten que pasar pola compatibilidade coa actividade pesqueira e a preservación do ecosistema. Por iso, en xuño de 2021 creouse o Observatorio da eólica mariña de Galicia, un foro estable de colaboración e diálogo entre os axentes implicados na súa implantación. A súa misión principal foi -e segue sendo- avaliar a coexistencia e compatibilidade desta tecnoloxía renovable coas actividades existentes a través de foros técnicos, a realización de estudos sobre oportunidades e impacto e a análise do potencial galego.

Por outra banda, Galicia tamén forma parte dunha alianza xunto con Asturias e Cantabria materializada no Clúster de Eólica Mariña Atlantic Wind, para colaborar en proxectos de demostración e impulso comercial desta tecnoloxía.

Tras a aprobación por parte do Estado do Plan de Ordenación do Espazo Marítimo (POEM), sen atender as achegas realizadas desde o sector e a Administración autonómica, Galicia segue pendente de coñecer o marco legal para a implantación dos proxectos, así como da convocatoria de poxas de lámina de auga para que os promotores se poidan presentar.