Vilagarcía de Arousa (Pontevedra), 3 de maio de 2023 O conselleiro de Cultura, Educación, FP e Universidades Román Rodríguez, participou esta mañá no encontro territorial do Plan Conecta FP para a comarca do Salnés, onde na actualidade cursan estas ensinanzas un total de 1.559 alumnos. Son un total de nove os centros que imparten un total de 49 programas e ciclos formativos nos concellos de Vilagarcía, Illa de Arousa, Cambados, O Grove e Sanxenxo.

Na xuntanza, na que participaron representantes do sector produtivo, con especial participación de autónomos e pemes, o titular do departamento educativo da Xunta de Galicia destacou a importancia da colaboración directa do mundo empresarial no crecente interese e demanda social da FP, “que nesta comarca se traduce nun 31% máis de matriculados na última década”.

“Acadar unha FP da máxima calidade e coa maior empregabilidade é un traballo conxunto –explicou–, para o que estamos contacto coas empresas a través destes encontros do Plan Conecta FP”. “Non se trata só de ofertar prazas, senón de facelo definindo e conectando os ciclos coas demandas de profesionais das empresas e coas necesidades de cada comarca”, incidiu. Neste sentido, sinalou o prestixio, a confianza e a utilidade como “os tres indicadores que miden o éxito da FP. Unhas ensinanzas que son xa a primeira opción educativa para moitos mozos, que ven nelas unha porta de entrada ao emprego e ao mundo laboral”, destacou.

Competitividade e empregabilidade

O celebrado esta mañá no CIFP Fontecarmoa é un dos 14 encontros territoriais que a Xunta está a organizar dentro do Plan Conecta FP, dotado con 30,7 M€, ademais doutros cinco encontros sectoriais. A partir de cada un deles crearanse outros 19 grupos de traballo que identificarán as necesidades actuais e futuras das empresas, analizarán as posibles transformacións produtivas e a súa implicación nos novos perfís profesionais relacionados con empregos futuros. Da análise de cada un dos grupos xurdirán plans de acción de formación especializada para cada ámbito profesional e territorial, que conformarán o Plan Conecta FP Galicia para deseñar e planificar a oferta destas ensinanzas á medida do tecido produtivo galego e de cada zona.

O obxectivo deste plan é formar profesionais cualificados que dean maior e mellor resposta ás necesidades das empresas favorezan a súa competitividade, así como a confianza da industria na FP. Isto redundará, ademais, nunha maior empregabilidade da poboación nova.

Xunto co conselleiro, interviñeron na apertura da xornada o presidente da Federación Comarcal de empresarios de Arousa, Jose Luis Vilanova Peña. Tras o acto de apertura, a xornada continuou co relatorio A Formación Profesional como vía de capacitación a cargo da directora xeral, Eugenia Pérez. Ao longo do día desenvólvense dúas mesas de traballo sobre a importancia da acreditación de competencias e a formación dos traballadores no mercado laboral e arredor das posibilidades de colaboración entre a FP e as empresas da contorna produtiva. Nelas participaron tanto representantes de centros educativos como de empresas.