A Xunta esgota o crédito destinado ao programa Galicia Renova Electrodomésticos tras recibir máis de 19.000 solicitudes
O vicepresidente primeiro e conselleiro de Economía, Industria e Innovación, Francisco Conde, aproveitou a visita realizada esta mañá a Zapping TV, en Lalín, para agradecer a colaboración dos 491 establecementos adheridos a esta campaña
A porcentaxe de axudas para consumidores vulnerables é a máis alta de todas as edicións
O vicepresidente primeiro e conselleiro de Economía, Industria e Innovación, Francisco Conde, visitou esta mañá en Lalín o establecemento Zapping TV, un dos 491 que, en toda a Comunidade, se adheriron ao programa Galicia Renova Electrodomésticos.
Tal e como informou o vicepresidente primeiro, a convocatoria esgotou xa o crédito destinado a esta iniciativa -que ascendía a 3 millóns de euros- tras recibir máis de 19.000 solicitudes. Nesta edición, ademais, alcanzouse a cifra máis alta de consumidores vulnerables apoiados (22,6 %).
O frigorífico-conxelador (3.693 solicitudes) e a placa de indución (3.274) foron as tipoloxías máis demandadas, mentres que as lavadoras foron os aparellos máis solicitados entre os consumidores vulnerables (1.654). Por provincias, Pontevedra foi a que máis peticións rexistrou (6.767), seguida da Coruña (6.524), Lugo (3.076) e Ourense (3.051).
O programa de axudas busca que as familias poidan adquirir electrodomésticos máis eficientes que contribúan a reducir a factura enerxética dos fogares, así como dinamizar as vendas do comercio de proximidade.
Imaxes relacionadas
