Santiago de Compostela, 27 de abril de 2023 Galicia expuxo na sede da Unesco en Venecia as técnicas aplicadas no Parque Natural da Baixa Limia-Serra do Xurés para mellorar a súa resiliencia ante o cambio climático co obxectivo de servir de modelo a outras rexións. 

Durante a conferencia final do proxecto de innovación Shelter que a Xunta desenvolveu durante os últimos 4 anos, a directora xeral de Calidade Ambiental, Sostibilidade e Cambio Climático, Sagrario Pérez, enmarcou a participación de Galicia nesta iniciativa no compromiso do Goberno galego de avanzar cara a unha transición ecolóxica e socialmente xusta para acadar unha Comunidade climaticamente neutra, circular e sostible. Nesa liña, puxo en valor a oportunidade que supuxo este proxecto da Unión Europea para desenvolver e compartir coñecemento e experiencias con outros países.

Logo de lembrar que o proxecto Shelter se deseñou para adaptar o patrimonio cultural e natural ante os riscos de desastres naturais froito do cambio climático, Sagrario Pérez explicou que Galicia seleccionou o Parque Natural da Baixa Limia-Serra do Xurés pola gran variedade de flora e fauna que alberga e o seu importante acervo histórico e cultural para convertelo nun “laboratorio aberto” no que identificar os riscos aos que se enfronta este espazo protexido e as posibles opcións para mitigalos.  

Accións de mitigación e adaptación no parque natural

Así, dentro das actuacións levadas a cabo, a directora xeral subliñou o desenvolvemento dun banco de xermoplasma, que consiste nunha colección de sementes e esporas que permitirá preservar especies da flora en perigo ou con interese de conservación. Xa se incorporaron case 60 especies no protocolo, que inclúe tamén a información necesaria para identificar, realizar mostraxes, preservar e introducir especies de novo na contorna. 

A maiores, desde o inicio do proxecto, identificouse a necesidade de integrar o coñecemento local, polo que se elaborou un plan de acción con asociacións e entidades locais, como, por exemplo, as comunidades de montes, para actuacións de mellora e recuperación de hábitats. 

De feito, nesa liña, levouse a cabo a actuación denominada Conservación, recuperación e posta en valor dos hábitats de Rebolar de Corvelle, que é unha masa forestal representativa galego-portuguesa composta por carballos e cerquiños. Os traballos de roza e poda realizáronse co obxectivo de conservar e axilizar a transición do hábitat cara a unha etapa máis madura ademais de favorecer a expansión deste hábitat en substitución das matogueiras que se localizaban na súa contorna.