A Xunta recibe 9 ofertas para executar un aparcadoiro disuasorio para o fomento do vehículo compartido na avenida de Breogán de Lugo, cun investimento de case 1,2 M€
O aparcadoiro emprazarase nunha zona estratéxica pola súa situación entre as estradas nacionais N-VI e N-540, ademais de pola súa proximidade ao Barrio da Residencia
As obras comezaranse despois do verán e contan cun prazo de execución de 10 meses
O estacionamento distribuirase nunha superficie de 5.700 m² cun total de 148 prazas, das que 4 se reservarán para vehículos adaptados á persoas con mobilidade reducida
Disporá dun acceso ao norte desde a rúa Barrio Casas e outro sur pola avenida de Breogán
Na actuación incluirase a renaturalización dunha canle que discorre parcialmente entubada pola parcela, a reconfiguración da rúa Barrio Casas, iluminación, videovixilancia e preinstalación de puntos de recarga para vehículos eléctricos
A Xunta recibiu nove ofertas de empresas para executar as obras dun aparcadoiro disuasorio para o fomento do vehículo compartido, asociado á implantación de zonas de baixas emisións, na avenida de Breogán, no concello de Lugo.
Este estacionamento disuasorio distribuirase nunha superficie de 5.700 m² que ofrecerá un total de 148 prazas, das cales 4 estarán reservadas para vehículos adaptados á persoas con mobilidade reducida.
A previsión é comezar os traballos tras o verán, cun prazo de execución de 10 meses.
Esta actuación forma parte dos proxectos promovidos pola Xunta ao abeiro dos fondos europeos do Mecanismo de Recuperación e Resiliencia Next Generation UE no impulso da transformación da mobilidade nas contornas urbanas, apostando por desprazamentos máis limpos e sostibles.