A Consellería de Infraestruturas e Mobilidade, a través de Augas de Galicia, licitou hoxe por 1.949.461 euros a obra de remodelación da ponte da rúa Fomento de Carballo, que inclúe a transformación da canle e motas de contención augas abaixo desta ponte, para reducir o risco de inundación no río Anllóns, ao seu paso polo municipio coruñés.

A actuación hoxe licitada, cun prazo de execución de 8 meses, permitirá intervir na zona da ponte onde se produce un estreitamento do leito do río Anllóns, sendo esa, pola súa escasa capacidade de desaugue, unha das zonas más inundables no casco urbano de Carballo en época de enchentes.

Este contrato forma parte das actuacións do convenio de colaboración entre a Xunta e o Concello de Carballo, para a execución das obras identificadas como prioritarias no Plan de xestión específico da área de risco potencial significativo de inundación deste río, cun investimento total de 6,3 M€.

As accións prioritarias son estas obras licitadas hoxe na ponte da rúa Fomento; ás que se suman as dúas intervención licitadas a pasada semana para a mellora no río Anllóns, ao paso pola Cepeira, en Sísamo, e para a remodelación de ponte e creación dun leito de augas altas na rúa Sol. A estas intervencións, súmanse as tamén contratadas para a remodelación integral do parque San Martiño e a realización dun by-pass na zona de Muíño do Quinto.

Todas as actuacións apostan pola naturalización do leito do río e polas infraestruturas verdes, fronte a solucións máis duras baseadas en intervencións que afastan aínda máis os ríos do seu estado natural.

No que se refire aos compromisos das administracións recollidos no citado convenio, a Xunta é a encargada da redacción dos proxectos e de executar as obras correspondentes ata completar a súa finalización.