Rueda cualifica de “positiva” e “frutífera” a viaxe a América na que a Xunta tendeu novas pontes de colaboración institucionais, económicas e comerciais

Subliña a reunión “moi produtiva” mantida con presidente da República de Panamá que permite afianzar relacións con este país en sectores claves como a pesca, o turismo ou as enerxías renovables

Considera “moi satisfactorios” os encontros con empresarios e inversores en México aos que lle trasladou que “merece a pena apostar por Galicia” e cos que se estreitaron lazos económicos que “poden ser moi frutíferos”

Destaca a gran fortaleza da colectividade galega no exterior logo de reunirse con representantes de varias entidades e coñecer en persoa os servizos e actividades que ofrecen aos galegos e os seus descendentes

Cidade de México (México), 18 de abril de 2023 O presidente da Xunta, Alfonso Rueda, amosa a súa satisfacción tras a viaxe por Panamá, Venezuela e México ao asegurar que foi unha visita “positiva con obxectivos cumpridos” e que cualifica de “frutífera”, xa que que o Goberno galego tendeu novas pontes de colaboración e estreitou alianzas tanto a nivel institucional como económico e comercial.

No eido institucional, Rueda destaca a reunión “moi produtiva” mantida co presidente da República de Panamá, Laurentino Cortizo, xa que considera que se “abren oportunidades para Galicia con moitas posibilidades de intercambio empresarial e económico”, en referencia a sectores claves para a comunidade como a pesca e o turismo e noutros ámbitos nos que Galicia aspira a converterse en líder como as enerxías renovables.

Ademais, o presidente da Xunta fai un balance “moi satisfactorio” dos encontros que mantivo con empresarios e inversores en México, e dos que asegura que “se están a fixar en Galicia”. Por este motivo, apunta que lles trasladou que a estabilidade actual da Comunidade galega fai que “mereza a pena apostar por Galicia” para desenvolver os seus proxectos industriais e amósase convencido que estas reunións nas que se estreitaron lazos económicos “poden ser moi frutíferas”.

Acompañar e recoñecer o traballo das comunidades galegas no exterior

Por último, Rueda resalta a importancia desta viaxe para comprobar a fortaleza das comunidades galegas no exterior tanto no pasado -como foi o caso dos 12.000 galegos que participaron na construción da Canle de Panamá- coma no presente a través dos centros e entidades de galegos que hai por toda Latinoamérica e nos que queda patente que a colectividade mantén un forte vínculo coa súa terra natal.

O presidente enxalza o “importante labor” que realizan estas entidades e pon en valor ver como mozos e mozas destes países celebran as festas tradicionais, difunden a cultura e o folclore galego ou aprenden este idioma. “É moi importante o que fan e hai que acompañalas e recoñecerllo”, defende, ao tempo que salienta especialmente o labor da colectividade galega en Venezuela, por ser “probablemente a que estea nun dos países coa situación máis complicada, e malia iso traballan coa mesma intensidade”, valóralles.

Ao longo destes días de viaxe institucional por Panamá, Venezuela e México, o presidente da Xunta amosou o compromiso do Goberno galego en apoiar a colectividade no exterior e expresoulle o desexo da administración autonómica de facilitar o retorno de aqueles que o desexen.

Imaxes relacionadas

Sons relacionados

Audio declaraciones del Presidente de la Xunta

Comercio Economía Emigración

Departamento:

A Presidencia da Xunta; Secretaría Xeral de Emigración

Data de actualización: 18/04/2023

Novas relacionadas

A Xunta continúa o traballo da man do tecido produtivo galego para garantir a cobertura de vacantes laborais e a remuda xeracional

O importe adxudicado dos fondos do Mecanismo de Recuperación e Resiliencia pola Xunta supera os 1.000 M€, case o 90 % do publicado

A Xunta impulsa a divulgación do oficio da sombreirería no ‘Festival Asnot’ de Padrón