O delegado territorial da Xunta en Pontevedra, Luis López, destacou o “forte impulso” que recibirán o deporte base, a cultura, as accións veciñais, o emprendemento e o fomento da inclusión co Plan Social de ENCE para Pontevedra, Marín e Poio, que volve a estar dotado con 3 millóns de euros.

O representante autonómico e o director territorial de ENCE en Galicia, Antonio Casal, presentaron hoxe esta iniciativa social no edificio administrativo de Benito Corbal e deron a coñecer tanto a contía como os prazos de presentación de proxectos, que se prolongarán entre o vindeiro martes 11 de abril e o 10 de maio.

“Presentamos este Plan Social con dous motivos de satisfacción. Por unha banda, a causa do mesmo, que é a continuidade da empresa na comarca de Pontevedra coa conseguinte importancia para a economía, a industria e o emprego e, por outra, os beneficios sociais directos para as entidades”, manifestou o delegado territorial.

O Plan Social destinará 900.000 euros ao deporte base, 600.000 euros para impulso ao emprendemento e a innovación, 530.000 euros para loita contra a exclusión, 400.000 euros para accións de recuperación da contorna, 300.000 euros para apoio á educación e a cultura e 200.000 euros para axudas veciñais, por só citar as partidas máis destacadas.

“Creo que estamos ante unha convocatoria moi celebrada e agardada porque vanse volver a financiar actividades moi relevantes que benefician aos nenos e á xente que o necesita, que coidan do noso medio ambiente, que impulsan o noso progreso ou que potencian hábitos tan saudables e formativos como o deporte”, salientou Luis López, que tamén puxo en valor a axilidade deste proceso: “O comité de seguimento entre a Xunta e a compañía, á que lle queremos agradecer a súa implicación e compromiso, actuou coa máxima celeridade, conseguindo sacar as bases en apenas seis semanas dende que o Tribunal Supremo confirmou a súa continuidade e iso responde ao único obxectivo de beneficiar canto antes a clubes, asociacións e outras entidades”.

Por último, o representante autonómico convidou a todos os colectivos interesados a que participen nesta convocatoria, lembrando que poden optar a ela todas as persoas físicas e xurídicas de Pontevedra, Marín e Poio que conten cun proxecto das áreas obxecto de subvención e que para elo deberán cursar a súa solicitude a través da páxina web www.plansocialence.es.