A Xunta licita por 2,2 M€ as actuacións de mellora de 51 paradas de autobús en estradas autonómicas de acceso á cidade de Lugo
As paradas de autobús que se van acondicionar están situadas en 15 estradas autonómicas ao paso por 10 concellos da provincia
As intervencións inclúen a mellora da contorna, coa execución de sendas ou beirarrúas, a instalación de novas marquesiñas ou a colocación de varandas
As empresas interesadas en executar estas obras teñen ata o 26 de abril para presentar as súas ofertas
Estas actuacións enmárcanse no Plan de mellora da seguridade e accesibilidade das paradas de autobús nas estradas autonómicas, co que a Xunta ten previsto investir arredor de 35 M€ para a mellora de 1.100 paradas en toda Galicia
A Consellería de Infraestruturas e Mobilidade licitou hoxe por 2.209.573 euros as actuacións de mellora da accesibilidade e conectividade de 51 paradas de autobús situadas nas estradas autonómicas ao paso das rutas de acceso polo norte á cidade de Lugo.
A Plataforma de Contratos Públicos da Xunta recolle hoxe o inicio da contratación desta actuación, á que as empresas interesadas poderán presentar as súas ofertas ata o vindeiro 26 de abril.
O obxecto deste contrato abrangue a mellora deste conxunto de 51 paradas de autobús situadas en 15 estradas autonómicas ao paso por 10 concellos da provincia.
A través do contrato licitado hoxe, a Xunta levará a cabo o acondicionamento de 30 paradas en Lugo; 5 en Xove; 4 en Castro de Rei; 2 en Riotorto; 2 en Outeiro de Rei; 2 no Vicedo; 2 en Cospeito; 2 en Begonte; 1 en Abadín; e 1 en Meira.
As intervencións proxectadas dotarán as paradas de autobús de marquesiñas, postes, bancos ou apoio isquiático.
Tamén se inclúen obras para facilitar as manobras dos autobuses e favorecer a conectividade das paradas a través da execución de beirarrúas ou sendas peonís.
Así mesmo, reforzarase a seguridade das paradas, tamén con perspectiva de xénero, coa eliminación de vexetación, a mellora da visibilidade e iluminación na súa contorna, e actuarase mellorando a información e a sinalización.
Estas intervencións enmárcanse no Plan de mellora da seguridade e accesibilidade das paradas de autobús nas estradas autonómicas, co que a Xunta ten previsto investir arredor de 35 M€ para a mellora de 1.100 paradas en toda Galicia.
Os proxectos están financiados ao abeiro do Plan de recuperación, transformación e resiliencia da Unión Europea–Next Generation EU e enmárcase no Plan de infraestruturas da Xunta para unha mobilidade segura, verde e intelixente.