A secretaria xeral de Industria, Paula Uría, participou hoxe na Coruña nun almorzo organizado por Nordés Club Empresarial no que achegou aos participantes as diferentes ferramentas que a Xunta de Galicia pon ao seu dispor para impulsar novas iniciativas. Así, Paula Uría sinalou que a través da Oficina Galicia Empresa se busca trasladar confianza e seguridade xurídica ao tecido empresarial e apoiar os seus investimentos, ofrecendo tamén orientación e asesoramento aos proxectos.

Na súa intervención tamén fixo referencia á Lei de simplificación administrativa e de apoio á reactivación económica de Galicia, que establece as figuras dos proxectos industriais estratéxicos, iniciativas empresariais prioritarias e proxectos de interese autonómico, contribuíndo a axilizar a tramitación das iniciativas.

Esta normativa enmárcase no compromiso de Galicia coa mellora regulatoria para captar novos investimentos, un camiño no que a Xunta vai da man cos Concellos Emprendedores, unha iniciativa na que xa colaboran preto da metade dos municipios galegos (153).