Santiago de Compostela, 28 de marzo de 2023 A Consellería de Infraestruturas e Mobilidade licita hoxe por un investimento de 1.399.784 euros as actuacións de mellora da accesibilidade e conectividade de 55 paradas de autobús situadas nas estradas autonómicas ao paso das rutas de acceso á  Coruña.

Tratase de actuar nas paradas correspondentes á zona oeste de acceso á cidade Coruña situadas en 6 estradas da titularidade da Xunta ao paso por 7 concellos das comarcas da Coruña e de Bergantiños.

A Plataforma de Contratos Públicos da Xunta recolle hoxe o inicio da contratación desta actuación, á que as empresas interesadas poderán presentar as súas ofertas ata o vindeiro 24 de abril.

Mediante o contrato licitado hoxe, as paradas que se van mellorar están situadas nas estradas AC-400, AC-413, AC-414, AC-418, AC-424 e AC-552. Concretamente, no concello de Arteixo, melloraranse 26 paradas; na Coruña 3; en Culleredo 12; en Carballo 9; en Cerceda 2; en Malpica 1 e en Ponteceso 2.

Como resultado do procedemento de información pública, nesta actuación incorpóranse dúas novas paradas propostas polo Concello de Arteixo, ambas as dúas situadas en dominio público viario na AC-552.

Tamén se retiran do proxecto varias paradas nas que o Concello de Arteixo xa ten previsto actuar con plans e programas municipais en marcha; e realízanse axustes nos deseños das paradas, a petición do Concello de Arteixo e do Concello da Coruña.

As intervencións a executar consistirán no acondicionamento dos carrís para a parada do autobús, a mellora da accesibilidade e a pavimentación da contorna coa execución de sendas ou beirarrúas.

Tamén se prevé a instalación de novas marquesiñas ou a colocación de varandas para protexer aos usuarios onde haxa desniveis.

Estas intervencións enmárcanse no Plan de mellora da seguridade e accesibilidade das paradas de autobús nas estradas autonómicas, co que a Xunta ten previsto investir arredor de 35 M€ para a mellora de 1.100 paradas en toda Galicia.

Os proxectos están financiados ao abeiro do Plan de recuperación, transformación e resiliencia da Unión Europea–Next Generation EU e enmárcase no Plan de infraestruturas da Xunta para unha mobilidade segura, verde e intelixente.