A delegada territorial da Xunta de Galicia en Vigo, Marta Fernández-Tapias, anunciou hoxe que o Goberno galego ten previsto construír 409 novas vivendas de promoción pública en Navia destinadas a alugueiro social coas que reforzará o actual parque público residencial da cidade, integrado por 578 VPP adxudicadas xa en réxime de arrendamento, con prezos reducidos.

Así o trasladou a representante autonómica durante a reunión con representantes de Os Ninguéns, colectivo social vigués que se ocupa das persoas vulnerables e en risco de exclusión, cunha dedicación especial aos asuntos relacionados coa vivenda. A xuntanza serviu para intercambiar información sobre a política residencial que a Xunta está a aplicar no Concello de Vigo e as necesidades detectadas pola entidade social.

Nese senso, a delegada da Xunta indicou que, ademais do parque público de vivenda que mantén o IGVS en Vigo e as promocións que ten previsto construír entre 2023 e 2026, o organismo autonómico acaba de adquirir un total de 18 novas vivendas na cidade, que eran propiedade de Sareb e Abanca, e que están adxudicadas en réxime de alugueiro social.

Ademais, preto de 400 persoas residentes no concello de Vigo están a recibir o Bono de alugueiro social, que lles supón unha axuda do 100 % para o pago do alugueiro da súa vivenda durante un prazo de 12 meses ampliable ata un total de 4 anos.

Ademais, a Xunta de Galicia concede axudas para o pago do alugueiro, tanto a menores de 35 anos como, con carácter xeral, axudas para a adquisición de vivendas protexidas e en centros históricos e está a desenvolver a ampliación de San Paio de Navia, con solo para a construción de preto de 1600 vivenda protexidas.