Miranda anima os galegos de Santos e Sao Paulo a emprender en Galicia a través das axudas deseñadas pola Xunta para fomentar o retorno
O secretario xeral da Emigración trasladou á colectividade galega no Brasil a nova Estratexia Galicia Retorna, que aposta polo eido laboral e o educativo con ata 100 iniciativas para favorecer o retorno á comunidade autónoma
Durante o encontro cos galegos residentes nestas dúas localidades brasileiras, expuxo as medidas deseñadas pola Xunta ás que poden optar tanto para poñer en marcha un negocio propio, como as Axudas ao Retorno Emprendedor, como para traballar por conta allea, como o Retorna Cualifica Emprego
Para aqueles que queiran regresar á comunidade para seguir formándose, a Secretaría Xeral mantén aberta ata o vindeiro 28 de abril as Bolsas Excelencia Mocidade Exterior (BEME) que permiten realizar un máster nunha das tres universidades galegas
O secretario xeral da Emigración, Antonio Rodríguez Miranda, presentou, ante as colectividades galegas de Santos e de Sao Paulo a nova Estratexia Galicia Retorna 2023-26, informando das vantaxes laborais e educativas que ofrece a Comunidade Autónoma para garantir a integración efectiva dos retornados a Galicia. Durante o encontro recordou os programas cos que conta a Xunta de Galicia para apoiar o emprendemento, así como o programa de Retorno Emprendedor da propia Secretaría que ten coma obxectivo apoiar aos galegos que retornan e queren poñer en marcha o seu negocio na nosa comunidade autónoma.
Antonio Rodríguez Miranda difundiu este documento no país carioca, onde residen 50.333 galegos, logo do seu paso pola Arxentina, O Uruguai, Suíza e A Alemaña. “A todos eles, ao igual que aos galegos do Brasil, trasladámoslles a importancia que ten, para a integración social dos retornados en Galicia, o apoio no eido laboral e formativo que estamos a ofrecer dende a Xunta de Galicia grazas a 100 medidas postas en marcha a través de todos departamentos autonómicos”, asegurou.
Deste xeito, a nova Estratexia conta cun importante protagonismo do eido laboral, e que ademais dos distintos programas de apoio ao emprendemento cos que contan as Consellerías de Promoción do Emprego e a de Economía, Industria e Innovación, a Secretaría Xeral da Emigración conta cunhas axudas directas para o Retorno Emprendedor que van dende os 6.000 aos 10.000 euros e que teñen como obxectivo axudar na posta en marcha dun negocio aos galegos retornados que desexan emprender. Estas axudas abrirán proximamente a súa convocatoria.