O director da Casa de Galicia en Madrid, Juan Serrano, recibiu ao alcalde de Friol, José Ángel Santos, quen presentou a Feira do queixo de Friol e pan de Ousá, que terá lugar o próximo 26 de marzo na Praza Andón Cebreiro e no Parque Rosalía de Castro do municipio.

A Feira do queixo de Friol e pan de Ousá é una cita anual que distingue a Friol como un lugar de referencia gastronómica en Galicia, dous produtos que celebran con moito orgullo neste municipio lucense, xa que son os seus principais sinais de identidade.

Esta festa tradicional representa o maior escaparate turístico para Friol, e potencia a actividade económica tanto local como na provincia de Lugo, sobre todo do sector primario e dos produtos agroalimentarios.

O alcalde, José Ángel Santos, explicou que , con esta visita á Casa de Galicia de Madrid, procúrase que o pobo de Friol teña unha maior visibilidade en todo o país e tamén fóra del e que a edición deste ano consiga récords de asistencia.