A delegada territorial da Xunta en Ferrol, Martina Aneiros, achegouse esta mañá ao municipio de Neda para visitar a foodtruck da campaña GALICIA SABE AMAR que estes días recala nas comarcas de Ferrol, Eume e Ortegal.

Este iniciativa da Consellería do Mar pretende enxalzar a gran variedade de peixes e mariscos cos que conta a comunidade e as especies características deses produtos da máxima frescura e calidade a través de catro rutas gastronómicas que percorrerán preto de 260 municipios de toda España vencellados co Camiño de Santiago. En total serviranse máis de 200.000 petiscos.

Aneiros celebrou o desembarco da iniciativa na zona onde xa visitou os municipios de Ares e Mugardos e a partir de mañá e ata o luns estará no de Narón, nas inmediacións do centro comercial Odeón en horario de 12.00 a 15.00 e de 17.00 a 20.00 horas. Tamén está previsto que pase por outros concellos da comarca nos vindeiros días.

A delegada animou aos veciños a achegarse estes días a estas foodtrucks e degustar algunha das 10 receitas que se van elaborar con produtos certificados do mar como o berberecho de Noia, o bonito do norte ou o mexillón de Galicia, xunto con outros da terra con denominación de orixe como as fabas, o mel, os pementos, os queixos, o pan e as patacas.

“Con esta campaña a Consellería pretende fomentar a inclusión de produtos do mar como elementos básicos da dieta á par que quere render ademais homenaxe a milleiros de profesionais que durante a pandemia traballaron arreo para que nos fogares galegos non faltase un prato de peixe”, destacou Martina Aneiros.

A representante do Goberno galego emprazou ás persoas interesadas a consultar os perfís de redes sociais da Consellería do Mar onde cada día se irá actualizando toda a información referida aos percorridos e paradas destas rutas gastronómicas.