A Xunta de Galicia, a través da Consellería de Cultura, Educación, Formación Profesional e Universidades, vén de completar a modernización e mellora da eficiencia enerxética do CPI O Toural de Vilaboa co cambio de todas as fiestras que non foron renovadas na primeira fase grazas a un investimento de 145.000 euros.

O delegado territorial da Xunta en Pontevedra, Luis López, acompañado polo xefe territorial de Educación, César Pérez, do alcalde de Vilaboa, César Poza, e doutros representantes municipais e educativos, supervisou hoxe esta actuación, que deu continuidade á primeira fase e que se centrou na dotación de novas ventás en varias aulas, salas específicas, os baños, os laboratorios e a zona de administración.

Cómpre sinalar que, con anterioridade, a Xunta de Galicia acometeu un cambio parcial das carpintarías exteriores, substituíndo as antigas de aceiro e un só vidro por outras de PVC, vidro dobre e cámara e caixa de persiana tipo monoblock. Dita primeira fase acometeuse nos espazos adicados a Educación Infantil, a biblioteca e algunhas aulas.

Agora, con esta segunda fase completouse o cambio das fiestras e realizáronse outras obras orientadas á correción de filtracións de auga no casetón do ascensor, o porche e certas zonas do pavillón como os vestiarios e o teito.

Así mesmo, executáronse reparacións puntuais e parciais das cubertas onde presentaban certos deterioros e a instalación de novas portas abisagradas con rotura de ponte térmica para reforzar as medidas de illamento e incrementar a confortabilidade do interior do colexio.

“Seguimos co noso compromiso con este centro público de Vilaboa, no que investimos case 350.000 euros nos últimos anos en obras de pavimentación, saneamento, fontanaría, mellora do ximnasio, renovación da calefacción ou arranxo da vivenda do conserxe e agora deixámolo en perfectas condicións con estas novas carpintarías exteriores e un illamento de primeiro nivel que favorece o axeitado desenvolvemento educativo”, concluíu o representante autonómico.