Ares (A Coruña), 28 de febreiro de 2023 A delegada territorial da Xunta en Ferrol, Martina Aneiros, acompañada de representantes municipais, visitou esta mañá as obras de mellora levadas a cabo no aparcadoiro da Casa Rectoral da localidade que contaron cunha subvención autonómica de 30.000 euros, a máxima posible, ao abeiro da orde de axudas de Turismo de Galicia para concellos de ata 10.000 habitantes para actuacións de mellora das infraestruturas turísticas.

Como puido comprobar Aneiros, a actuación está vinculada á adecuación do espazo público destinado ao estacionamento de vehículos dos turistas que visitan o municipio, coa fin de reducir o impacto visual que producen e optimizar as rúas de acceso a interiores do entorno da antiga Casa Rectoral.

A representante da Xunta destacou que o obxectivo principal destas axudas é “fomentar a recuperación, a accesibilidade e a sinalización dos recursos turísticos en concellos de ata 10.000 habitantes como é o caso de Ares de cara a consolidación da oferta turística nas zona rurais”.

Aneiros lembrou que está aberta a convocatoria deste ano que conta cun orzamento de 3 M€ “o que supón un incremento do 200 % con respecto ao importe da convocatoria do pasado ano”, destacou. O importe máximo da axuda a cada entidade beneficiaria será de 30.000 euros e o prazo para solicitalas remata o 31 de marzo.