A Xunta de Galicia anima ao Concello de Vilanova de Arousa a solicitar este ano unha axuda autonómica para impulsar a construción dun punto limpo fixo no municipio que facilite o depósito e a recollida dos residuos domésticos especiais por parte da veciñanza.

Así llo trasladou a conselleira de Medio Ambiente, Territorio e Vivenda, Ángeles Vázquez, ao alcalde, Gonzalo Durán, no marco da reunión que mantiveron recentemente co fin de abordar asuntos de interese municipal relacionados coas súas competencias.

En concreto e tras coñecer o interese do Goberno municipal por dotarse dun punto limpo, Ángeles Vázquez avanzoulle ao rexedor que o seu departamento ten previsto convocar este ano unha nova orde de axudas destinada a apoiar ás entidades locais galegas na construción deste tipo de instalacións ou na mellora e acondicionamento das mesmas, no caso de concellos que xa conten con elas.

Neste sentido, a responsable autonómica lembrou que o ano pasado a Xunta tamén apostou por este tipo de subvencións, salientando a boa acollida que tivo o programa entre os concellos. De feito, indicou que se concederon incentivos económicos para apoiar un total de 30 proxectos en toda Galicia.

A día de hoxe máis de 2,2 millóns de galegos contan xa cun punto limpo fixo a menos de 10 minutos do seu domicilio, unha rede que se completa con decenas de instalacións móbiles co fin de que toda a cidadanía poida chegar a dispoñer deste servizo. Así, para facilitar aos concellos o cumprimento deste obxectivo a Xunta destinou nos últimos 4 anos un investimento de 7,7 millóns de euros a financiar un total de 137 proxectos municipais en materia de puntos limpos.