A Xunta buscou sempre garantir a seguridade dos traballadores e das persoas usuarias. Así como o bo funcionamento das instalacións xudiciais trasladadas á Cidade da Xustiza de Vigo, segundo asegurou hoxe a secretaria xeral técnica da Vicepresidencia Segunda e Consellería de Presidencia, Xustiza e Deportes, Elena Muñoz, hoxe no Parlamento de Galicia. Muñoz interveu na Comisión 1º Institucional, de Administración Xeral, Xustiza e Interior para responder unha pregunta oral sobre as obras de adaptación feitas no edificio do antigo Hospital Xeral para acoller a nova infraestrutura xudicial.

Elena Muñoz incidiu en que a modificación do contrato se realizou cumprindo todos os requisitos establecidos na lexislación vixente e contou con todos os informes técnicos e xurídicos precisos, negando calquera tipo de discrecionalidade na súa execución. Esa modificación foi a mellor solución técnica e económica, xa que “resultaba imprescindible a execución desas obras complementarias para garantir a seguridade da infraestrutura ante as deficiencias detectadas”, engadiu.

 Infraestrutura referente

Para a secretaria xeral técnica, Vigo dispón xa dunha infraestrutura que era moi necesaria para a cidade e que se converteu nun referente a nivel estatal. Nesta liña, referiuse ao traslado dos órganos xudiciais, que se está producir seguindo o calendario acordado cos sectores implicados e coa incorporación dos sistemas tecnolóxicos máis avanzados.

Ademais, permitiu duplicar o espazo con respecto aos anteriores xulgados, pasando de 20.500 metros cadrados a case 44.000, sinalou. Finalizado o traslado, a Cidade da Xustiza acollerá 40 unidades xudiciais mais Fiscalía e servizos comúns. Nela traballarán máis de 500 traballadores que terán á súa disposición unha escola infantil de 41 prazas a prol da conciliación familiar e laboral.