A delegada territorial da Xunta en Ferrol, Martina Aneiros, acompañada do tenente de alcalde de Pontedeume, José Simoes, e o xefe territorial da consellería de Infraestruturas e Mobilidade, José Antonio Álvarez, supervisou esta mañá as obras de mellora do saneamento de Pontedeume que, tras retomarse o pasado mes de novembro, avanzan a bo ritmo.

Os traballos, que contan cun investimento de 4,2 M€ e que se prevé que estean concluídos en verán, correspóndense coa 1ª fase de mellora nos sistemas de depuración da ría de Pontedeume, con actuacións neste municipio e en Cabanas.

Tal e como lembrou Aneiros durante a visita na que estivo acompañada por técnicos da UTE que se fai cargo da intervención, o obxectivo das obras é o de optimizar o funcionamento do sistema de tratamento de augas residuais que comparten estes municipios e no que se inclúe a construción do novo colector, tanque de retención e bombeo.

“O Goberno galego apoia con estas obras aos Concellos para que exerzan en mellores condicións as súas competencias municipais de saneamento e depuración das augas e no caso concreto de Pontedeume, contribúe tamén a reducir as infiltracións de auga de mar e de augas brancas que chegan á depuradora”, sinalou a representante da Xunta.

As obras que se están a executar en Pontedeume inclúen a construción dun novo colector interceptor, máis adaptado ás necesidades actuais de saneamento, que xa está executado, e dun tanque de tormentas, onde actualmente se centran os traballos. Concretamente estanse a construír os muros interiores desta infraestrutura hidráulica.

Ademais estase a avanzar no baipás e os pilotes do tanque de retención previsto, que permitirá regular a entrada de caudais á depuradora de Centroña, así como evitar vertido. Prevese tamén un colector de alivio deste tanque e unha cámara de bombeo das augas ata a estación de depuración.

O saneamento da ría de Pontedeume completarase coa renovación do colector interceptor do núcleo de Cabanas, no que a Xunta investirá 1,4 M€ e coas obras de construción dun tanque de retención e impulsión en Cabanas, ás que se destinarán case 2,9 M€.

Aneiros lembrou os 2,87 M€ consignados nos Orzamentos da Xunta de 2023 para as obras de saneamento do estuario do Eume, 400.000 euros para esta 1ª fase en Pontedeume, e 2,47 M€ para as fases II e III, no municipio de Cabanas, aos que se suman os 620.000 euros de investimento previstos para 2024.