Cartelle (Ourense), 8 de febreiro de 2023  A Xunta valora o compromiso do Concello de Cartelle coa protección da paisaxe, logo de levar a cabo a rehabilitación de varios inmobles municipais, ao abeiro da orde de axudas do Goberno galego para a corrección de impactos paisaxísticos.

Durante unha visita a este municipio ourensán, na que estivo acompañado polo seu alcalde, Jaime Sousa, o director do Instituto de Estudos do Territorio, Enrique de Salvador, puxo este Concello como exemplo á hora de empregar esta liña de financiamento, posta en marcha pola Xunta de Galicia en 2021, para actuacións que permitan corrixir e mellorar o aspecto exterior de vivendas, edificios e equipamentos públicos municipais deteriorados polo paso do tempo e por unha insuficiente conservación.

Así, De Salvador salientou os traballos de rehabilitación realizados na fachada da escola da Seara, na que se eliminaron fendas e desconchados nos seus paramentos a través da limpeza, reparación de danos e posterior pintado.

Ademais, tamén visitou a actuación feita no lavadoiro Fontegrande, no que se instalou unha estada, se limpou e rexuntou a mampostería, pintouse e realizouse unha soleira de formigón.

Para levar a cabo estas actuacións, o Concello contou con preto de 40.000 euros de financiamento, o máximo ao que poden optar as entidades locais nesta liña de axudas.

Cómpre lembrar que a Xunta convocou este ano unha nova edición desta iniciativa, que, cun orzamento inicial reservado de 2 millóns de euros —1 millón para particulares e 1 millón para concellos—, estímase que se poderá axudar a máis de 50 entidades locais e a case 400 cidadáns.