A Xunta vai potenciar a integración dos servizos de taxi na cadea de transporte público autonómico co obxectivo de favorecer desprazamentos útiles e eficientes no rural.

O director xeral de Mobilidade, Ignacio Maestro, interveu hoxe na Comisión 2ª do Parlamento, onde explicou que esta medida está recollida na Estratexia de Mobilidade de Galicia, presentada esta mesma semana e cuxo obxectivo é responder ás necesidades das persoas e das mercadorías de xeito máis eficaz, sostible, económico e seguro.

Puxo como exemplo o Concello de Folgoso do Courel, que grazas ao Plan de Transporte Público de Galicia impulsado pola Xunta, dispón agora de servizos de autobús regulares, dos que antes carecía.

Destacou a importancia de proporcionar no rural, en municipios como o de Folgoso de Courel, outras alternativas complementarias ao autobús como o taxi, para facilitar a mobilidade dos veciños.

Neste sentido, lembrou que os últimos incentivos concedidos pola Xunta no ano 2022 posibilitaron a adquisición en Folgoso do Courel dun taxi adaptado, un servizo co que non contaba ata o de agora.

Apuntou que esta alternativa do taxi é eficiente en zonas como Folgoso so Courel, con pouca poboación e dispersa, cunha orografía complexa e cunhas condicións climáticas adversas no inverno.

Área de Transporte de Galicia

Ignacio Maestro concretou, ademais, que a Xunta, na liña de continuar mellorando o transporte público, porá en marcha este ano a Área de Transporte de Galicia, unha medida que tamén beneficia especialmente ao rural.

Detallou que Folgoso do Courel vai ser nos próximos meses un dos 119 concellos rurais de reducida poboación que se van integrar de xeito automático, sen ter que achegar un só euro nin facer ningún trámite burocrático.

Explicou que o Goberno galego asumirá nestes casos todas as bonificacións dos veciños, que serán equiparables ás do transporte metropolitano, cun desconto de 50 céntimos no prezo dos billetes e a gratuidade dos transbordos.

Oferta de transporte multiplicada

Ignacio Maestro puxo en valor o Plan de Transporte Público de Galicia, co que a Xunta multiplicou a oferta en todo o territorio, dun xeito eficiente e con novas modalidades como o transporte compartido e baixo demanda.

Remarcou que Galicia conta  agora cunha rede de autobús interurbano que ofrece máis e mellores conexións, pasando de 927 a 3.500 liñas; de 20.500 a 55.000 paradas e de 1,48 millóns de servizos ao ano a 2,35 millóns.

Subliñou que a Xunta segue avanzando na aposta por un transporte público de calidade para todos os cidadáns, cun orzamento que este ano se incrementa ata acadar máis de 90 millóns de euros.