Santiago de Compostela, 4 de febreiro de 2023 O investimento da Xunta desde 2020 para apoiar as entidades deportivas da comunidade -1.300 clubs e 59 federacións- na súa actividade e na dotación do seu equipamento achégase aos 62 M€.

Por provincias, o investimento máis elevado no período 2020-2023 corresponde á de Pontevedra con 12,5 M€, seguida da Coruña con 10,7 M€. No caso de Lugo e Ourense, as entidades deportivas destas provincias recibiron do Goberno galego 3,8 M€ e 2,8 M€ respectivamente.

Con estas axudas abárcanse as 59 modalidades deportivas oficialmente recoñecidas en Galicia, o que garante o desenvolvemento das actividades de promoción e fomento dende a base á alta competición deportiva, e nos ámbitos autonómico e supra autonómico.

Deste xeito, as distintas actuacións da Administración autonómica incorporan mecanismos para o fortalecemento de sectores estratéxicos do sistema deportivo como son o da práctica feminina, a inclusiva ou, entre outros, a práctica en idade escolar.

Estes case 62 M€ abarcan as achegas destinadas, entre outros conceptos, a convenios coas federacións deportivas ou con agrupacións deportivas escolares, as actividades do Plan Corresponsables, as axudas en apoio á actividade e equipamentos ou os patrocinios de alta competición. De feito, inclúense os 15,3 M€ previstos nos orzamentos deste 2023 para estes aspectos.

Deste xeito, a Xunta aposta por un sistema deportivo que supere a vertente competitiva, a través da promoción da actividade física polos beneficios que aporta desde o punto de vista da saúde pública, da educación e tamén da economía como sector produtivo con achega específica á actividade económica e ao emprego en Galicia.

Este esforzo demóstrase tamén co incremento neste 2023 no orzamento da Vicepresidencia Segunda da Xunta no ámbito do deporte. En concreto, superará os 44 M€, o que supón un 36 % máis que en 2022 e, ademais, o maior orzamento da historia do deporte galego.

Nesta liña, cómpre destacar o investimento realizado en 2021 en apoio ao deporte galego para a súa recuperación tras a pandemia da covid.  Como resultado, as máis de 292.400 licenzas deportivas coas que se pechou o ano pasado xa superan as cifras prepandemia e no caso do programa Xogade, a última tempada pechouse con máis de 120.000 mutualizados, preto dos 128.000 de 2019.