A Xunta destina máis de 123.500 € ao equipamento do novo xulgado de primeira instancia de Lugo
O director xeral de Xustiza, José Tronchoni, visitou xunto co presidente do TSXG, José María Gómez y Díaz-Castroverde, o novo órgano xudicial que comeza a funcionar hoxe atendido por oito traballadores da Administración de Xustiza
O Goberno galego financia tamén o custo de persoal, que ascende a preto de 191.000 euros anuais
A posta en marcha enmárcase na petición de novas unidades xudiciais feita pola Xunta en consenso co TSXG no marco da Comisión Mixta de Xustiza
Lugo, 2 de xaneiro de 2023 O director xeral de Xustiza, José Tronchoni, visitou xunto co presidente do Tribunal Superior de Xustiza de Galicia (TSXG), José María Goméz y Díaz-Castroverde, o novo xulgado de Primeira Instancia número 6 de Lugo que comeza a funcionar hoxe e no que a Xunta investiu máis de 123.500 euros para o acondicionamento e equipamento dos espazos. Na visita tamén participaron o presidente da Audiencia Provincial, Edgar Amando Cloos, a xuíza decana e o fiscal xefe de Lugo, Olalla Díaz e Roberto Brezmes, así como os decanos dos colexios de avogados e de Procuradores, de Lugo, José Félix Mondelo e Jacobo Varela, entre outros representantes institucionais.
Ademais dun maxistrado e un letrado da Administración de Xustiza, o novo xulgado conta con oito prazas de funcionarios -dous xestores, catro tramitadores e dous auxilios-. O custo deste último persoal asúmeo a Xunta e ascende a preto de 191.000 euros anuais. Así mesmo, os espazos xa dispoñen do mobiliario e o equipamento informático precisos para o seu correcto funcionamento, dotado tamén polo Goberno galego.
O director xeral de Xustiza destacou a relevancia desta nova unidade para o sistema xudicial en Lugo, xa que estará especializada en asuntos de familia e permitirá darlle maior axilidade a estes procedementos.
A posta en marcha deste xulgado foi aprobada polo Ministerio de Xustiza a través dun Real Decreto de creación de unidades xudiciais en resposta á petición da Xunta, consensuada co Tribunal Superior de Xustiza de Galicia no marco da Comisión Mixta de Xustiza. Neste mesmo marco aprobouse a maiores a posta en marcha dos xulgados de Primeira Instancia número 15 da Coruña e número 16 de Vigo, que tamén comezan a funcionar hoxe. No conxunto das tres novas oficinas xudiciais, a Xunta creou 24 prazas de funcionarios. Nesta liña, José Tronchoni referiuse á necesidade da creación de sendas prazas de maxistrado nas seccións 2ª das audiencias provinciais da Coruña e de Pontevedra, tal e como se lle solicitou ao Goberno central e para as que non deu resposta.
Imaxes relacionadas
