A Xunta de Galicia ampliará o número de prazas do programa Benestar en Balnearios tras o éxito que tivo a edición celebrada este ano, que contou coa participación dun total de 637 persoas maiores que cubriron o 100 % das ofertadas. A través desta iniciativa, o Goberno galego promociona hábitos de vida saudables desde a idade adulta, a participación activa, os coidados e as relacións sociais para evitar posibles situacións de illamento ou de soidade non desexada.

Esta proposta recuperouse neste ano 2022 logo de tres exercicios de parón obrigados pola pandemia da covid-19. A esta edición destináronse preto de 140.000 euros, o que supuxo un incremento do 24 % sobre a última convocatoria. Benestar en Balnearios desenvolveuse en 15 establecementos situados nas catro provincias galegas, con 37 quendas que tiveron lugar entre o pasado o 1 de novembro ata o 17 de decembro.

As persoas inscritas nesta iniciativa, todas elas maiores de 60 anos, tiveron a oportunidade de pasar dez días en réxime de pensión completa desfrutando de tratamentos termais. Ademais, tiveron seguimentos médicos e unha ampla oferta de actividades de animación sociocultural para completar unha grata estadía.

Xuntos polo Nadal

O programa Benestar en Balnearios forma parte das propostas que o Goberno galego impulsa para favorecer un envellecemento activo e saudable. Estre estas iniciativas destaca Xuntos polo Nadal, que se está a celebrar nas Residencias de Tempo Libre de Panxón e O Carballiño, onde máis de 300 persoas maiores que non teñen con quen pasar estas datas tan sinaladas desfrutan de compañía e actividades de lecer.