Así o recolle o Portal de Contratos Públicos de Galicia
A Xunta licita o subministro e instalación de salas de radioloxía dixital robotizadas para o Hospital Clínico Universitario de Santiago de Compostela
O investimento do Goberno galego nesta aparataxe é de 769.000 euros
As empresas interesadas teñen de prazo ata o 23 de outubro para presentar ofertas
Os equipos estarán dotados con tecnoloxía dixital directa e totalmente robotizados, mellorando a calidade da imaxe diagnóstica e diminuíndo a carga de traballo
Santiago de Compostela, 25 de setembro de 2024
A Xunta de Galicia, a través da Consellería de Sanidade, vén de publicar no Portal de Contratos de Galicia a licitación do contrato para o subministro e instalación de salas de radioloxía dixital robotizadas para o Hospital Clínico Universitario de Santiago de Compostela.
O investimento recollido no contrato ascende a 769.560 euros. As empresas interesadas neste contrato teñen de prazo ata o vindeiro 23 de outubro para presentar as súas ofertas.
Este contrato responde á necesidade de dar unha correcta cobertura á poboación coa mellora dos servizos de radioloxía deste hospital da rede sanitaria pública galega.
Todos os equipos que se instalarán estarán dotados con tecnoloxía dixital directa e totalmente robotizados, mellorando a calidade da imaxe diagnóstica e diminuíndo a carga de traballo debido á automatización de movementos, permitindo a integración total das imaxes e as doses do paciente cos sistemas de información corporativos do Servizo Galego de Saúde.