Valladolid, 25 de setembro de 2024

A directora xeral de Mobilidade, Judit Fontela,  participou esta mañá nunha xornada sobre Sistemas Intelixentes (ITS) en Valladolid, organizada polo Foro de Novas Tecnoloxías do Transporte, onde explicou o impulso que a Xunta está a dar á Plataforma Galega de Mobilidade (PGM) 4.0. como solución aos desafíos do Plan de Transporte Público de Galicia e co obxectivo de acadar un transporte dixital e sostible.

Tal e como explicou a directora xeral, trátase dun sistema software levado a cabo desde a Dirección Xeral de Mobilidade e a Axencia para a Modernización Tecnolóxica de Galicia (Amtega) que permita potenciar o uso do transporte público e modernizar os métodos de pago no transporte. A plataforma está financiada pola Unión Europea a través do Plan de Recuperación, Transformación e Resiliencia.

De feito, as solucións previstas enmárcanse en catro piares: proporcionar novos métodos de pago cun sistema baseado na conta das persoas usuarias e non na tarxeta que xa se activou de maneira experimental en cinco liñas das concesións da Xunta; poñer en marcha un planificador intermodal que integrará nun único punto toda a oferta de transporte e mobilidade da comunidade; ou dotar ás persoas usuarias de información en tempo real no que se refire ao paso por parada dos servizos de transporte público, tempos de espera e de chegada, transbordos, ubicación e distancia á parada, grado de ocupación, tarifas e descontos, entre outros servizos complementarios.

O cuarto piar fai referencia á activación dunha nova web e unha aplicación móbil que, entre as súas funcionalidades, incluirá a posibilidade de realizar reserva e pago de viaxes, de prazas nos servizos baixo demanda ou recarga de saldo.

Judit Fontela explicou que a previsión é que esta plataforma estea en funcionamento con todas as súas funcionalidades habilitadas en 2026. Ata agora -lembrou- xa se executou o planificador multimodal na aplicación móbil co obxectivo de a finais de ano tamén estea dispoñible na web e o pago con móbil a través de QR en varias liñas.

Para o próximo ano, segundo avanzou a directora xeral,  están previstos outros programas pilotos para o pago con transporte coa nova tarxeta de transporte público de Galicia, para o pago con tarxeta bancaria e para o uso da tarxeta bancaria en modo postpago.

Plan de Transporte Público de Galicia 

Na súa intervención, ademais de presentar a nova plataforma, Judit Fontela tamén fixo balance do actual do Plan de Transporte Público de Galicia no que a Xunta inviste máis de 140 millóns de euros anuais e que contribuíu a que, actualmente, máis do 97% da poboación teña una parada de autobús a menos de un quilómetro do seu domicilio.

Puxo como exemplo de medidas de éxito recollidas neste plan os servizos integrados ou compartidos entre escolares e demais persoas usuarias en zonas de baixa demanda ou os servizos baixo demanda habilitados para mellorar a conexión do rural coas grandes urbes.

Ademais, detallou as mellores levadas a cabo polo Goberno galego coa promoción dunha política tarifaria uniforme e económica cunha Tarxeta de Mobilidade de Galicia (TMG)  con bonificacións de ata o 50%. Outro dos retos -explicou- foi a gratuidade no transporte para menores de 21 anos e maiores de 65 a través da implantación da tarxeta Xente Nova en 2021 e a Tarifa +65 habilitada este ano. En ambos casos fináncianse ata 60 viaxes mensuais gratuítas na rede de autobuses da Xunta.

Na xornada na que participou a directora xeral de Mobilidade abordase a aplicación dos sistemas intelixentes ou ITS tanto na xestión do tráfico urbano e interurbano. O evento reúne ao sector público, privado e académico relacionado cos sistemas intelixentes de transporte para facer máis segura, sostible e eficiente a mobilidade das persoas e mercadorías de distintos modos de transporte.