A Consellería do Medio Rural aposta polos produtos de proximidade e de calidade diferenciada nos comedores escolares a través da campaña “Come Local”
O director da Axencia Galega da Calidade Alimentaria, Martín Alemparte, participou hoxe nunha actividade desta campaña celebrada en Ponteareas
A xornada contou cunha mesa redonda na que participaron produtores locais e responsables dos centros educativos que forman parte de “Come Local” e tamén houbo catas e obradoiros de produtos con selos de calidade diferenciada
No curso pasado participaron nesta iniciativa de Medio Rural medio cento de centros escolares de toda Galicia
Ponteareas (Pontevedra), 21 de setembro de 2024
O director da Axencia Galega da Calidade Alimentaria da Consellería do Medio Rural, Martín Alemparte, participou hoxe nunha actividade enmarcada na campaña “Come Local” que se celebrou no concello pontevedrés de Ponteareas. Esta iniciativa, promovida pola Consellería e que se desenvolve en centros edicativos, ten por obxectivo promocionar o produto de proximidade con selo diferenciado como parte do Pacto Verde Europeo e a estratexia “Da Granxa á mesa” da Unión Europea.
A actividade, que tivo lugar ao longo de toda a xornada, contou cunha mesa redonda na que participaron produtores locais e responsables dos centros educativos que forman parte desta iniciativa e a participación da medallista olímpica Teresa Portela. Ademais, celebrouse un acto de graduación para os cociñeiros do “Come Local” que formaron parte desta campaña no pasado curso.
Ademais, houbo a disposición dos asistentes un mercado con produtos integrados nas “Experiencias de Calidade” promovidas pola Axencia Galega da Calidade Alimentaria, no que están incluídas as diferentes Denominacións de Orixe Protexidas e as Indicacións Xeográficas Protexidas. Outras actividades programadas durante o día foron uns obradoiros da man da IXP Mel de Galicia e Pan Galego, así como catas cos queixos premiados na última celebración da Cata dos Queixos de Galicia e de mel certificado.
Este evento tamén serviu para dar a coñecer o selo Artesanía Alimentaria, xa que se contou cunha das empresas operadoras Xearte Brigitte para falar deste distintivo que protexe as producións alimentarias galegas elaboradas de xeito artesá.
No curso pasado participaron no “Come Local” medio cento de centros escolares de toda Galicia. Para esta nova edición, a inscrición dos centros interesados abrirase de novo a finais deste mes de setembro.
Imaxes relacionadas
