A Axencia para a Modernización Tecnolóxica de Galicia e a Federación Galega de Asociacións Universitarias Seniors achegan a banca dixital ás persoas maiores
Ambas entidades colaboran na posta en marcha dun ciclo formativo de 5 sesións que poden seguirse en liña ou de xeito presencial nas aulas da Rede CeMIT
A aula de Arzúa acolle mañá a primeira das xornadas, que continuarán ata mediados de outubro
Santiago de Compostela, 11 de setembro de 2024
A Axencia para a Modernización Tecnolóxica de Galicia (Amtega) e a Federación Galega de Asociacións Universitarias Séniors (FEGAUS) poñen en marcha unha nova edición do programa formativo para achegar o uso da banca online ás persoas maiores. A primeira das cinco xornadas previstas comeza mañá na aula CeMIT de Arzúa. O ciclo formativo continuará ata mediados de outubro nas de Vilar de Santos, Leiro, A Estrada e Vigo.
Son sesións presenciais, cunha duración de 60 minutos, que se retransmiten tamén online, co asesoramento dos dinamizadores das aulas CeMIT, e ademais poderán seguirse a través de canalsenior En cada unha delas explicarase de xeito práctico como realizar paso a paso operacións con caixeiros automáticos e trámites online.
Estes seminarios, especialmente orientados ás persoas maiores con foco na contorna rural, compleméntanse con materiais adicionais como videopílulas, podcasts, infografías co paso a paso dos trámites explicados nas sesións de inspiración e xogos.
Os contidos formativos preséntanse de xeito sinxelo e abranguen as compras online, como interactuar co banco mediante intelixencia artificial, os dereitos dos usuarios na era da banca dixital, o aluguer de vehículos e outros servizos da banca dixital, como a contratación de seguros ou préstamos a través do móbil.
Os interesados en participar de xeito presencial poden poñerse en contacto cos responsables das aulas CeMIT nas que se celebra cada seminario ou inscribirse a través do portal da Rede: https://cemit.xunta.gal.
Programación dos seminarios
AULA |
DATA |
HORARIO |
INSCRICIÓN |
CEMIT Arzúa |
12/09/2024 |
10:30 a 11:30 |
https://cemit.xunta.gal/gl/formacion/formacion-presencial/47335 |
CEMIT Vilar de Santos |
24/09/2024 |
17:00 a 18:00 |
https://cemit.xunta.gal/gl/formacion/formacion-presencial/46722 |
CEMIT Leiro |
04/10/2024 |
10:30 a 11:30 |
https://cemit.xunta.gal/gl/formacion/formacion-presencial/46827 |
CEMIT A Estrada |
10/10/2024 |
10:30 a 11:30 |
(Proximamente) |
CEMIT Vigo |
14/10/2024 |
12:00 a 13:00 |
https://cemit.xunta.gal/gl/formacion/formacion-presencial/46806 |