Vilagarcía de Arousa, 20 de xullo de 2024

A Xunta, a través do Servizo Galego de Saúde, levou a cabo unha actuación de humanización do hospital de día oncohematolóxico do Hospital Público do Salnés co obxectivo de que mellorar a atención aos pacientes ao dotalo de espazos máis adaptados e cun maior grado de comodidade para que os tempos de tratamentos sexan máis agradables e nun entorno máis amable.

O conselleiro de Sanidade, Antonio Gómez Caamaño, realizou esta semana unha visita ao Hospital Público do Salnés na que estivo acompañado polo xerente da área sanitaria de Pontevedra e O Salnés, José Flores e na que remarcou que a humanización de espazos destinados aos doentes “non é unha opción, senón que constitúe unha peza fundamental da atención sanitaria”.

Unha medicina máis humanizada

Gómez Caamaño remarcou que o obxectivo da Xunta é avanzar cara a “unha medicina o máis humanizada posible” e para iso avogou por ter sempre presentes aos doentes e os seus acompañantes á hora de tomar decisións no sistema sanitario público.

Para avanzar nese obxectivo, Gómez Caamaño lembrou que os orzamentos do presente ano 2024 dispoñen dunha partida de 1,5 millóns de euros para habilitar melloras nas salas de espera que empregan os pacientes que acoden a tratamentos de quimioterapia nos centros hospitalarios de Santiago de Compostela, de Ferrol, de Ourense e de Vigo.

Con ese investimento, ampliaranse espazos, ademais de instalar novo mobiliario e deseñar unha estética agradable. Tal e como explicou o conselleiro de Sanidade, estas melloras xa se acometeron nos hospitais da Coruña e de Lugo, mentres que en Pontevedra se incluirán no novo hospital Montecelo que se está a construír nestes intres.

Gómez Caamaño tamén visitou a nova área de Hospitalización a Domicilio e os futuros espazos que albergarán a base operativa do 061 no Hospital do Salnés.

Máis de catro anos en funcionamento

O hospital de día oncohematolóxico do Hospital do Salnés permite desde hai máis de catros anos, desde que comezou a súa actividade en xaneiro de 2020, ofrecer tratamentos e terapias sen necesidade de hospitalización aos pacientes do distrito sanitario arousán.

Ten unha superficie de 250 metros cadrados, con capacidade para dez pacientes e o servizo funciona de luns a venres, en horario de mañá.

Estas dependencias reducen os tempos de estadía no hospital de Ande e bríndalles aos pacientes a oportunidade de regresar aos seus fogares, mantendo deste xeito unha vida máis familiar e contando co apoio dos seus seres queridos. En 2023, atendeu a 1.603 pacientes, cunha media mensual de 134 usuarios.

Ao proporcionar unha contorna máis familiar e cómoda, a recente humanización de espazos do hospital de día oncohematolóxico do Hospital do Salnés axuda a reducir o estrés e promove a comodidade emocional dos pacientes, o que repercute nunha maior eficiencia dos seus tratamentos.

Outro beneficio importante do hospital de día é a dispoñibilidade de servizos de apoio psicolóxico e emocional. Os pacientes do distrito sanitario arousán e as súas familias reciben terapia individual ou grupal, xunto con asesoramento nutricional e programas de benestar integral.

Segundo sinala a supervisora do servizo oncohematolóxico e do equipo de continuidade de coidados de Psiquiatría do Hospital do Salnés, Sonia Fons “o apoio emocional é fundamental nos tratamentos de cancro, xa que axuda aos pacientes para enfrontar os desafíos emocionais e mellorar a súa calidade de vida durante os procesos de tratamento”.