Santiago de Compostela, 21 de xullo de 2024

A Xunta reduciu a burocracia para as máis de 29.000 familias numerosas de Galicia. A principal novidade é que se unifica nun só procedemento os trámites de solicitude, renovación, modificación ou duplicado do Título de Familia Numerosa, así como a solicitude do Carné Familiar Galego e do certificado de non nado, que permite acceder a vantaxes antes de que se produza o nacemento.

Ata o de agora, a Xunta tiña diferentes procedementos para realizar estes trámites, o que supoñía maior carga burocrática para as familias. Por exemplo, a solicitude do Carné Familiar tiña que realizarse de xeito independente á solicitude do Título Oficial, o que obrigaba ás familias a realizar dúas solicitudes distintas.

Esta redución da burocracia responde a unha demanda da Asociación Galega de Familias Numerosas (AGAFAN), coa que a Xunta vén traballando desde hai anos na adopción de medidas a prol deste colectivo. Hai que recordar que o Título oficial de Familia Numerosa é único para toda a familia e con validez para toda España; mentres que o Carné Familiar é un documento individual para cada membro da familia e permite acceder a descontos e vantaxes en máis de 600 establecementos galegos adheridos.