Sanidade e Colexio de Farmacéuticos de Pontevedra colaboran na campaña de información en farmacias sobre prevención e control do mosquito tigre
As farmacias serán parte dunha rede de alerta temperá que permitirá coñecer os posibles incrementos significativos de picaduras de insectos e avaliar se son debidos ao mosquito tigre
Difúndense recomendacións para non contribuír á proliferación desta especie, evitar a súa picadura e fomentar o uso da app Mosquito Alert
Este ano refórzase o número de Concellos que colaboran coa Rede Galega de Vixilancia de Vectores na provincia de Pontevedra co fin de estudar a posible expansión do vector
As actuacións encádranse na campaña de información e formación que desenvolve a Dirección Xeral de Saúde Pública e que tamén inclúen os centros de saúde
Pontevedra, 12 de xullo de 2024
A Consellería de Sanidade, a través da Dirección Xeral de Saúde Pública, en colaboración co Colexio de Farmacéuticos de Pontevedra, inicia unha campaña de información en farmacias sobre a prevención e o control do mosquito tigre ou Aedes albopictus.
A subdirectora xeral de Saúde Ambiental e Seguridade Alimentaria, Inés Mato Naveira, xunto coa presidenta do Colexio de Farmacéuticos de Pontevedra, Beatriz García Iglesias, presentaron no día de hoxe a campaña na sede do Colexio en Pontevedra.
Con esta campaña, a Xunta, como xa fixera o ano pasado, volve poñer de manifesto a relevancia da colaboración cidadá para o control deste vector de enfermidades como os virus do dengue, chikungunya ou Zika.
Mediante esta iniciativa trasládanse as recomendacións para non contribuír á proliferación do mosquito tigre, evitar a súa picadura e fomentar o uso da app Mosquito Alert, coa que se permite enviar fotografías de mosquitos detectados, posibles lugares de cría e mesmo picaduras de mosquito para que sexan validadas por expertos do Consello Superior de Investigacións Científicas (CSIC) e da Rede Galega de Vixilancia de Vectores (ReGaViVec), grazas ao convenio subscrito entre a Xunta e as universidades de Santiago de Compostela e de Vigo.
O ano pasado reportouse a presenza do mosquito tigre nos concellos de Moaña, Vigo, Cangas, Redondela e Vilaboa. A vixilancia establecida pola ReGaViVec abarca este ano a máis concellos da contorna co fin de estudar a posible expansión do mesmo. No que vai de ano 2024, unicamente se detectou na aplicación Mosquito Alert en Moaña e en Vigo, mentres que no trampeo da rede só se detectou nas mostras recibidas do concello de Moaña.
Comité Técnico do Mosquito Tigre
Así mesmo, e continuando coas medidas de xestión, este xoves celebrouse o segundo Comité Técnico do Mosquito Tigre de 2024. Nel, os diferentes organismos informaron do estado actual da situación do mosquito Aedes albopictus en Galicia.
A esta xuntanza asistiron profesionais da Dirección Xeral de Saúde Pública do ámbito da epidemioloxía e saúde ambiental, investigadores expertos en entomoloxía da USC e UVigo, profesionais da área de Gandaría da Consellería do Medio Rural, representantes de Patrimonio Natural da Consellería de Medio Ambiente e Cambio Climático, de Emerxencias 112-Galicia, da área sanitaria de Vigo, da Dirección Territorial de Sanidade de Pontevedra e dos concellos de Moaña e Vigo.
Desde o comité volveuse incidir na importancia da concienciación cidadá para a eliminación de focos de cría en recintos particulares e a participación cidadá realizada a través da plataforma Mosquito Alert, coa que colabora a Rede Galega de Vixilancia de Vectores (ReGaViVec), integrada polas Consellerías de Sanidade e Medio Rural, ademais das Universidades de Santiago de Compostela e de Vigo.
A próxima reunión do comité será a mediados do mes de agosto, sempre que non sexa necesario que se convoque de forma extraordinaria.
Na páxina web do departamento sanitario autonómico facilítase información detallada sobre o mosquito tigre así como os carteis e trípticos da campaña presentada hoxe.
