Santiago de Compostela, 5 de xullo de 2024

O director xeral de Cultura, Anxo M. Lorenzo, participou hoxe na presentación da XII edición do Festival Groba, onde agradeceu o importante labor de difusión do legado do mestre Rogelio Groba que se fai nesta cita a través dun amplo programa de actividades entorno á música clásica.

O representante da Consellería de Cultura, Lingua e Xuventude sinalou o compromiso por manter viva a herdanza do mestre Rogelio Groba que “con máis de 720 obras publicadas foi un dos compositores galegos máis importantes do século XX”. Ademais, o director xeral de Cultura recoñeceu a relevancia deste evento “por converter Ponteareas, vila natal do compositor, nun punto de encontro para a música clásica”.

Neste senso, Anxo M. Lorenzo salientou a consolidación deste festival, enmarcado na grande oferta de festivais culturais en Galicia que promove o Goberno galego, leva doce anos atraendo a Ponteareas importantes músicos do panorama nacional e internacional, e tamén se mostra como unha plataforma para impulsar novos talentos e a creación nesta modalidade artística. Lembrou, ademais que se atopa enmarcado dentro da nova edición de CulturON, a campaña que ten en marcha a Xunta e que enche os meses de estío de cultura ofrecendo máis de 30 actividades diarias.

O Festival Groba, que se celebrará do 18 ao 24 de agosto en Ponteareas, conta cun amplo catálogo de propostas. Entre elas, concertos, obradoiros, conferencias, clases maxistrais, presentacións de discos ou concursos de interpretación. Ademais, no evento terá lugar a estrea de Danzas Gulanesas, unha obra do ciclo étnico Galicia Anterga que será interpretada pola Orquestra de Cámara Galega e a clausura desta edición que a fará a Orquestra Sinfónica de Galicia.