Vigo, 5 de xullo de 2024

A conselleira de Vivenda e Planificación de Infraestruturas, María Martínez Allegue, xunto coa delegada da Xunta en Vigo, Ana Ortiz, participou hoxe en Vigo nun almorzo informativo coa Asociación de Construtores de Pontevedra, que preside Miguel Caruncho.

Trátase dun novo encontro co sector, no que a conselleira expuxo que nestes momentos a Consellería de Vivenda e Planificación e Infraestruturas ten licitacións en curso por importe de 126M€, a meirande parte do Instituto Galego da Vivenda e Solo.

Ademais, adiantou que para os vindeiros meses neste departamento están previstas licitacións por importe de 117M€, sobresaíndo tamén as correspondentes ao Instituto Galego da Vivenda e Solo.

A responsable autonómica, á que o presidente da asociación empresarial se referiu como “a nosa conselleira de cabeceira”, agradeceu a invitación a este frutífero encontro, celebrado nun clima cordial que permitiu abordar os retos da Xunta en materia de vivenda e infraestruturas, que se acadarán traballando en colaboración co sector.