O presidente da Xunta asiste á presentación do libro de Enrique López Veiga
Rueda salienta o papel de ‘Historia Marítima de Galicia’ á hora de entender a comunidade como unha das maiores potencias pesqueiras
Vigo, 1 de xullo de 2024
O presidente da Xunta de Galicia, Alfonso Rueda, asistiu hoxe á presentación do libro Historia Marítima de Galicia de Enrique López Veiga en Vigo, onde salientou que esta obra permite entender a importancia da actividade marítima na economía galega e que converte á comunidade nunha das maiores potencias pesqueiras.
Durante o acto, no que estivo acompañado polo conselleiro do Mar, Alfonso Villares, animou á cidadanía galega a valorar e coñecer de maneira máis profunda a relación da comunidade co mar e a recoñecer a importancia do sector marítimo-pesqueiro para o desenvolvemento de Galicia.
Historia marítima de Galicia está formado por dous volumes que suman case 1000 páxinas e que dan conta da relación entre o autor e o mar de Galicia. A ambientación das historias céntrase en Vigo, unha cidade cuxo porto pode considerarse un referente a nivel nacional e internacional no ámbito naval e pesqueiro.
A experiencia do autor
Enrique López Veiga, exconselleiro de Pesca e expresidente da Autoridade Portuaria de Vigo, sempre divisou un gran futuro na pesca galega avogando pola modernización deste sector, onde destacou pola reivindicación do papel da muller nun sector tan masculinizado. Rueda salientou a súa contribución ao mundo da pesca, xa que foi quen iniciou os debates sobre a Política Marítima de Europa, abrindo o camiño para o que sería a xestión pesqueira do futuro.
Imaxes relacionadas
